Llección d'humanidá ante l’Holocaustu

Más de trescientos alumnos de siete colexos ya institutos asturianos recibieron ayeri n'Uviéu una llección d'eses que nun s'escaecen. Los estudiantes qu'allegaron al Auditoriu Príncipe Felipe –toos ellos d'ente 15 y 16 años– salieron con un nuedu en gargüelu dempués de tar tola mañana repasando ún de los episodios más salvaxes ya inhumanos de la hestoria de la humanidá: l'Holocaustu, el xenocidiu entamáu polos nazis que-yos costó la vida a seis millones de xudíos europeos a lo llargo de la Segunda Guerra Mundial. "Nun podemos dexar qu'esto vuelva asoceder", repite concenciada María Fernández, una alumna de quince años del colexu uvieín Nazaret.

La comunidá xudía n'Asturies lleva 19 años entamando esti tipu d'actos educativos, que siempre coinciden cola selmana del 27 de xineru, el día nel que se conmemora la lliberación del campu d'esterminiu d’Auschwitz, ún de los símbolos del horror nazi. "Creemos que ye una xornada perbeneficiosa pa los estudiantes. Nuna mañana despachen dende’l periodu d’enteguerres hasta que termina la Segunda Guerra Mundial, los profesores tamién saquen muncha rentabilidá dende’l puntu de vista pedagóxicu", esplica Aida Oceransky, la presidenta de la comunidá xudía n'Asturies. "Esta parte de la hestoria ye perimportante porque acaba de pasar. Lo que-yos intentamos tresmitir a estos rapazos ye que nun se dexen gobernar, que reflexonen y nun se dexen llevar por ideoloxíes que lleven a situaciones como la qu'asocedió colos nazis", amiesta Oceransky, que pon como exemplu lo que ta pasando en Gaza y a les facciones estremistes del Islam. "Quieren acabar cola sociedá occidental", diz.

Sofitándose en vídeos y testimonios de dellos supervivientes, los miembros de la comunidá xudía asturiana consiguieron llevar el mensaxe hasta’l corazón de los estudiantes. "Una de les coses que más m'impresionó foi escuchar a esa muyer cuntando cuando se salvó de morrer nuna furaca común a los siete años. Disparáron-y, pero nun fueron quien a matala y tuvo escondida ente decenes de muertos hasta que marcharon los nazis. Ye terrible", señala Paula Hevia, de les Dominiques d'Uviéu. "En clas faláronnos sobre l'Holocaustu, pero nun ye lo mesmo que velo colos tos propios güeyos", fae Noa Espinar, del IES Cuenca del Nalón de La Felguera.

Munchos de los estudiantes nun sabíen que los nazis-yos cortáben el pelo a los xudíos pa rellenar almuhaes o colchones, que los usaben como cobayes n’esperimentos médicos macabros nin munches de les otomíes que se cometieron nos campos de concentración. "Nel institutu inda hai xente que se declara racista y homófoba, que falta a persones que son negres o a los homosexuales", reconoz "avergoñada" Carla González, del IES Astures de Llugones. "Somos nós mesmos los que tenemos que torgar esti tipu d'actitúes ya ideoloxíes porque la hestoria ta demostrándonos que son perpeligroses", axunta al so llau un compañeru que marcha del Auditoriu cola llección bien aprendía.