El colexu de San Cloyo reedita la victoria olímpica n’asturianu

El colexu de San Cloyo caltién la so corona como campeón olímpicu d’asturianu. Per segundu añu consecutivu, el centru ganó’l Concursu de redaición escolar "Urbano Rodríguez" pa la etapa de Primaria convocáu pola Academia de la Llingua Asturiana. El colexu uvieín alzóse col trunfu nes dos ediciones celebraes hasta la fecha.

Seis escolares pelearon na final nel Muséu Arqueolóxicu, con dos representantes del centru de San Cloyo: Ana Menéndez García y Lola Álvarez García, que cursen quintu. "Tamos percontentos cola respuesta de los alumnos a los trabayos pa preparar la olimpiada", apunta la profesora de Llingua Asturiana de Primaria, Lucía Menéndez, qu’amiesta que les dos estudiantes que pelearon pola final "tienen que tar arguyoses". La docente indica qu’a los grupos a los que da clase nel colexu de San Cloyo "gústa-yos enforma la escritura creativa". "Tou esto lleva trabayu de fondu y una base importante", fae.

Los dos representantes del centru escolar uvieín San Cloyo quedaron nes primeres posiciones nel concursu de Primaria. El primer premiu foi p’Ana Menéndez y el segundu pa Sonia Martínez. Lola Álvarez ocupó tamién ún de los puestos destacaos na olimpiada de redaición n’asturianu. "Tamos percontentes", aseguren les dos alumnes, que tornaron del Muséu Arqueolóxicu con premio.

A les estudiantes facilitáron-yos delles imaxes –d’oveyes y un molín, ente otres– y sobre elles teníen qu’escribir un relatu. L’anterior fase del concursu fixéronla nel colexu, pero pa esta tuvieron que dir hasta’l Muséu Arqueolóxicu. "Tábemos un poco nervioses", señalaron les dos alumnes del colexu de San Cloyo. El xuráu que valoró les redaiciones de los finalistes tuvo compuestu por Xosé Ramón Iglesias como presidente, con Aida Celemín de vocal ya Inaciu Galán como secretariu.

Diecisiete participantes de los más de 150 que ficieron la primer fase del concursu llegaron a la final entamada pola Academia de la Llingua Asturiana. En Secundaria y Bachilleratu, el primer premiu foi pa Martín Peña y el segundu pa Xune Artime, con una mención especial p’Aitana Carcedo.

El colexu de San Cloyo llevó la victoria nes sos dos participaciones nel certame. Alredor de mediu centenar d’alumnos, de primeru a sestu, del centru cursa Llingua Asturiana a lo llargo d’esti cursu. Esti trimestre van enfotase nes mazcaraes d’iviernu y nel próximu nos conceyos d’Asturies, ellaborando un mapa pa conocer les sos carauterístiques y creando inclusive una pequeña axencia de viaxes que facilite l’aprendizaxe.

Nel centru uvieín trabayen ensin llibros de testu pa Llingua, quitando en primer y segundu cursu de Primaria. Nel restu fáenlo con proyeutos.

Per otru llau, nel Certame de propuestes de terminoloxía especializada, dientro del Concursu d’investigación convocáu pola Academia de la Llingua Asturiana, la primer posición foi pa Xesús González Rato pol trabayu tituláu "Anovamientu y ampliación de términos médicos". El premiu col que ta dotáu’l concursu ye de 600 euros. El xuráu tuvo compuestu por Xosé Antón González Riaño, como presidente; Marcos Martínez Fernández, como vocal, y Ana María Cano González, como secretaria.