Vil.lapindi, el colexu que quier tirar d’un valle enteru
La puxanza del centru educativu turonés llogró esti cursu pasar de 6 a 26 alumnos, con permunchos programes formativos y teniendo la implicación del propiu pueblu
![Alumnos e profesores, nel xardín del centru escolar.](https://estaticos-cdn.prensaiberica.es/clip/8b67c94b-0522-40fe-8261-923db056d58e_16-9-aspect-ratio_default_0.jpg)
Alumnos e profesores, nel xardín del centru escolar. / David Montañés
Enumerar les mines que se trancaron en Turón a lo llargo de les últimes décades diba ser una xera minuciosa y trupa. Nun diba ser menos enguedeyao contabilizar los colexos que cerraron n’Asturies por cuenta del despoblamientu que carez el mediu rural. Ún y otru enclín tendríen de concasar en Vil.lapindi, pero la realidá ye que l’afayadiza escuela del pueblu paez remocicar, en cuenta d’amostalgase. El centru pasó de tener matriculaos el cursu pasáu 6 alumnos namás a cuntar esti añu con 26. Una maraviya qu’aveza a dase mui poco en zones castigaes por un bultable despoblamientu, como ye’l casu d’esti cascáu valle mierense.
![Vil.lapindi, el colexu que quier tirar d’un valle enteru | TALLER DE ROBÓTICA NEL COLEXU. | DAVID MONTAÑÉS](https://estaticos-cdn.prensaiberica.es/clip/99367474-e746-4976-bfd2-d6906678f026_alta-libre-aspect-ratio_default_0.jpg)
Los alumnos del colexu de Vil.lapindi, coles sos maestres, al pie del edificiu de la escuela vieya, con dibuxos de los vecinos. / David Montañés
Diba resultar arriesgao venceyar la repentina puxanza del colexu de Villapendi a un solu factor, polo que ye aconseyable citar posibles motivos que dexen entender el resurdir de la escuela. De mano, ye obligao apuntar que’l profesoráu del centru anovó dafechu’l cursu pasáu. Cuatro maestres moces formen el personal fixu de la escuela, con otros trés docentes impartiendo clas a media xornada. Les families sorrayen el puxu de les funcionaries a la hora d’activar la vida escolar en Vil.lapindi: "Más qu’un cole, somos una gran familia", rescampla Alejandra Postigo, direutora en funciones. "Crecimos enforma, pero siguimos teniendo la ventaya de ser pocos". Nesti casu, destácase’l tamañu pequeñu del colexu como un gran beneficiu.
![Vil.lapindi, el colexu que quier tirar d’un valle enteru](https://estaticos-cdn.prensaiberica.es/clip/e0dfc429-c1e1-4714-8f83-c60eaf177631_alta-libre-aspect-ratio_default_0.jpg)
Taller de robótica. / David Montañés
Que namás haya dos aules, una d’Infantil y otra de Primaria, nun se ve como una torga pal desenvolvimientu de l’actividá docente, sinón como un valor que s’axunta: "Tener a neños de 6 y 12 años na mesma clas solo ye un problema pa la profesora, que tien que dar respuesta a la demanda de cada nivel. Pero al cabu esta situación ayuda a desenvolver ún de los oxetivos qu’entamemos, que ye ufiertar una formación personalizada a les necesidaes de cada alumnu", señalen les profesores.
Dibuxos nel edificiu
Si les families destaquen el compromisu y la implicación de les maestres como una de les claves pa la puxanza del colexu, les docentes devuelven los emponderamientos a la comunidá. "Cuntamos con una asociación de padres mui collaboradora y, amás, el cole ta abiertu al pueblu y el pueblu, al tiempu, participa de la vida del colexu", rescampla Alejandra Postigo.
Son los vecinos los que caltienen l’ampliu xardín del colexu nun estáu inmeyorable. Tamién fueron ellos los qu’afataron con dibuxos l’edificiu de la vieya escuela, en desusu y yá afectáu polos primeros síntomes de deterioru: "Ye una pena qu’esti inmueble nun s’utilice pa daqué. Diba ser por casu un allugamientu ideal pa una escuela de ñácaros", apunten dende la comunidá educativa.
El colexu Vil.lapindi apruz dende un pequeña llomba a los verdes cordales qu’acuruxen el valle. "Esti magníficu entornu natural déxanos abrir el colexu y davezu les clases d’Infantil fáense nel xardín. Intentamos escapar de la imaxe de la escuela tradicional", señalen les maestres.
El centru destaca tamién por una amplia programación d’actividaes ya iniciatives que refuercen la formación puramente académico. Anguaño la escuela de Vil.lapindi anda enyerbada nun taller de robótica que sufraga la empresa Nasturgy y que lleva por títulu "Efigy Girls". Busca afalar el talentu femenín nes STEM nel ámbitu de la enerxía. Les alumnes del centru van dir en xunu hasta Madrid pa presentar el prototipu d’autobús sostenible nel que lleven trabayando gran parte del cursu.
El colexu tamién collabora cola ciudá teunolóxica de Valnalón al traviés d’un programa pa mozos entamadores: "Los alumnos crearon una cooperativa, col so logo, estatutos y órganos de representación. La finalidá ye crear con material recicláu productos qu’al términu del cursu van vendese na plaza d’abastos de Mieres", apunta la direutora. Coles ganancies, los alumnos van entamar una gran acampada nel centru mesmu, con neños y maestres pernoctando nos xardinos peles celebraciones de San Xuan: "Fixímoslo l’añu pasáu per primer vegada y foi un ésitu total". La escuela va tener dientro poco un aula de radio y participa n’iniciatives como’l taller de teatru n’asturianu, amás de cuntar con un ecogüertu.
Intensa actividá
El colexu de Vil.lapindi reivindica un nuevu futuru pal apagáu valle industrial de Turón. Vistu l’espectacular aumentu de matrícules, yá solicitaron al conceyu de Mieres l’apertura d’un comedor escolar, serviciu que pa la so implantación cumple con tolos requisitos. Agora bien, lo que tendría de ser un momentu namás de mires de futuru positives viose parcialmente estropiáu por un problema col tresporte escolar. Dellos neños, dalgunos d’apenes 4 años d’edá, vense obligaos a aportar caminando al colexu per una carretera bastante pindia y ensin ceres. El motivu ye que l’autobús pósalos en tierra magar que la solución al problema abulta que ye tan cenciella como facer una parada más nel percorríu, ensin esviase, y movilizar un vehículu con cuatro places adicionales. La comunidá educativa negocia col Principáu que los nuevos alumnos puedan disfrutar d’esi serviciu: "Si’l colexu crez, tamién tienen de crecer los recursos. Hai que demostrar con fechos que s’apuesta pola escuela rural", señalen. En Vil.lapindi hai motivos pa doblar esta apuesta.
- Media España en alerta por lo que ha dicho la Guardia Civil sobre lo que está pasando con las tarjetas de crédito
- Alejandra Rubio abandona su casa con Carlo Costanzia
- Bruno, feliz ante la reciente noticia del embarazo, confirma en Reacción en cadena cómo se va a llamar el bebé: 'Como tú
- Suso Álvarez y las razones de su ruptura con Bea Retamal: 'No sabía que se estaba enamorando ni que tenía sentimientos
- Belén Esteban confiesa por primera vez los motivos de su ruptura: 'El fallo lo tuve yo
- Vuelven las carabelas portuguesas y obligan a cerrar al baño una de las playas más concurridas de Asturias
- Se descubre la nueva ilusión de Suescun mientras participa en Supervivientes: 'Nos gustamos
- Alessandro Lequio rompe su silencio y habla abiertamente del problema de salud que padece: 'Me acaban de llegar los resultados