El colexu Santa Teresa abre restaurante

Los alumnos del últimu cursu d’Infantil, de 5 años, del colexu Santa Teresa de Xesús d’Uviéu averáronse esti trimestre a la cocina y a los restaurantes. El proyeutu que desarrollaron los 52 escolares nes aules a lo llargo de les últimes selmanes llevólos al IES Leopoldo Alas Clarín p’aprender de los estudiantes de los ciclos formativos del centru cómo s’ellaboren galletes y collaborar con ellos decorándoles. Tamién visitaron supermercaos y dos establecimientos hosteleros pa conocer el so funcionamientu.

N’adquiriendo conocimientos llueñe del centru de les Teresianes, punxéronse al llabor colo qu’aprendieren entamando un pequeñu "restaurante". Primero cocinaron y dempués tomaron nota de los pidíos de los veceros y sirvieron les meses. Los comensales del establecimientu na xornada de la so inauguración fueron los sos compañeros de 3 años. Y el platu escoyíu pa ufierta-yos foi un flan. "Échense güevos, lleche y azucre, y remuévese", afirma Emma Naves, de 5 años, esplicando cómo se fexo. N’enfornándolo, pa lo que recibieron ayuda de personal del colexu, yá taba llisto pa sirvir.

Pero, enantes, "punximos les meses", comentó Lara Álvarez, a la que, mesmo qu’al so compañeru Rodrigo Andrade, de toles xeres que fexeron la que más-y prestó foi "cocinar". "Fiximos la decoración", dixo David Álvarez, en referencia a les meses que prepararon primero que los veceros sentasen pa tastiar el flan. Nelles, apuntó Rodrigo Andrade, "teníemos un códigu QR". Aportando a él podía consiguise la receta.

Un llabor qu’empezó buscando nel aula al qu’alleguen los más pequeños del centru, de 3 años, güevos, pa ellaborar el flan, nel orixinal piteru de cartón, que tien pites feches con papel. Esti proyeutu, que se llama "Los restaurantes", permite que los alumnos "trabayen dellos conteníos al tiempu" y qu’apriendan muncho", apuntó Salomé Alonso, coordinadora d’Infantil. Al pie d’ella trabayaron nel proyeutu Cecilia Fernández y Sonsoles de Barutell, docentes del últimu cursu del segundu ciclu d’Educación Infantil. María Fernández, Covadonga Martínez y María Aller son les profesores del primer cursu d’esta etapa educativa, que collaboraron nel proyeutu.

La iniciativa "Los restaurantes" inclúi tamién talleres de cocina, qu’imparten les families. "Implicáronse y participaron munches", aseguraron los profesores del colexu Santa Teresa de Xesús, dirixíu por Beatriz Flórez. A unos metros de les aules d’Infantil hai un güertu, que curien los escolares de 5 años. Ellí hai llechugues, espinaques, freses, perexil o albahaca, ya inclusive un espantuxu. Y un gallineru que llegó a tener pites.