L'Asociación Española de Abogados Cristianos denunció a la directora d'una conocida clínica abortista xixonesa por vulneración al honor y púnxola esta selmana delantre'l xuez en Valladolid. Acúsenla de llamalos subvencionaos. L'honor, asuntu intanxible, vien a ser al alma lo que la cartera al bolsu del pantalón d'un paisanu. Como estos creen nel espíritu inmortal, lo que-yos digas de les perres rúxe-yos nos pliegues del alma y, polo visto, escuez. Si tol mundu tuviere la pelleya tan fina, los tribunales diben colapsar (más tovía). Ganaderos, bablistes, xente del teatru, toreros, chinos, amigos de los perros y mil categoríes más notaron, alguna vez, cómo apuntaba pa escontra d'ellos el deu acusador del integrista neoliberal, pero nun denunciaron. Estos abogaos píos (tocante a relixosos, non a benignos) anímense a facelo porque tendrán la ventaxa, camiento yo, de que-yos sal gratis el letráu.
¿Tenemos honor que vulnerar los profesores? El míu debe tar insensibilizáu embaxo una postiellona de más de trenta años d'ofenses discentes y administratives. Dígolo porque, en vez d'indignación, fue una carcaxada lo que me provocaron les opiniones d'un conferenciante que pasó'l miércoles pel Centru de Profesores y Recursos de Xixón a esplicanos la vida a los qu'entramos nes aules de la enseñanza pública a ganar el sueldu. Polo visto, lleva años escribiendo sobre la homofobia nel sistema educativu y, si nos axustamos a la entrevista que-y fexo LA NUEVA ESPAÑA, llegó a la conclusión de que:
a) Los profes tenemos que dar el pasu de nun aceptar nel aula l'insultu "maricón".
b) En materia d'acosos homofóbicos y transfóbicos, los profes, más que formaos, tamos deformaos.
c) Los profes presuponemos que los alumnos son toos heterosexuales, y tamos enquivocaos.
d) Si los profes homosexuales nun se declaren públicamente como talos delantre la comunidá educativa ye porque los centros escolares nun los dexen espresase con llibertá.
Bueno, ye too mentira, como usté supondrá: nin aceptamos insultos de ningún tipu ente alumnos, nin somos tan elementales como pa pensar que toos tienen los mesmos gustos nin tan zotes como pa nun entender los problemes a los que s'enfrenta alguién que descubre, na adolescencia, una sexualidá que nun se correspuende colos estándares tradicionales. Y, en xeneral, los profes, con independencia de lo que nos ponga cayuelos (que neso nun somos casta aparte y hai de too, como en toles profesiones), nun solemos dir proclamándolo de pizarra en pizarra porque la materia del cursu nun somos nosotros. Namás falta revelar qu'esti señor que pasó pel CPR, seguro qu'usté ya lo camentaba, nun da clase en Secundaria: ta too dicho.
En vez de pone-y una demanda por vulnerar el mio honor docente, voi ser benignu, al revés que los abogaos cristianos cola directora de la clínica abortista, y voi confesar que lu entiendo, que me faigo cargu: d'algo hai que vivir. Alguna manera tenía qu'atopar esti paisanu pa facese un sitiu nel mundu competitivu, ruinu y desacreditáu de la investigación en ciencies sociales. Vio venir una ola y mangóse enriba d'ella. Mui bien, felicidaes y equilibriu pa surfeala, qu'hai qu'aguantar, con postura elegante, hasta la oriella del retiru. ¡Pero, home, a costa de disparar contra'l pringáu que mancha les manes con tiza, non, ho!
miliorodriguezcueto.wordpress.com
