Suscríbete

Contenido exclusivo para suscriptores digitales

Esti güevu sal quier

Esto y aquello

Los enredos internos del PP astur

Mayada va llegar Mallada a mayu / y el mayador que col mayu la maya / (o mayadora) quier facer magaya / cola probe pa mandala al carayu.

Perdóneme, paciente lector, l'arrebatu líricu. Ún disfruta como un verderón colos ripios de Muñoz Seca y l'astracán del PP asturianu anima a emular esta prestosa categoría de rimes cutres.

La última escena de la comedia (puesto per delantre que siempre va seguir otra) consiste nun comunicáu firmáu pola candidata Mallada esplicando, o queriendo facelo, a cuentu de qué alguién echó a rodar, xusto agora, un comprometedor informe d'auditoría de cuando ella yera presidenta d'Hunosa. Ya ta usté al tanto: lo de la ropa de críu, el mariscu, los dos másteres de papu, etc.

El comunicáu de Mallada suena a derrota. Tien una tonalidá agónica, y eso ye un error estratéxicu pa quien quiera tener alguna espectativa política. Compónenlu cuatro párrafos. El tema del primeru ye "yo, que soi víctima"; el del segundu, "los malos que quieren acabar comigo"; el terceru, un mix de los anteriores; el cuartu, una cosa ente "Braveheart" y el "Resistiré" del Dúo Dinámico.

"Estoy sufriendo una campaña de acoso y derribo." "El foco soy yo porque molesto." "Me atacan a mí." "Tengo que perder tiempo y energía en desmentir..." "Buscan denigrarme." "Se empeñan en evitar que yo sea presidenta", y más pol estilu. Ún nunca se va cansar de declarase polignorante, y de negocios sociopolíticos, de lo que más, pero piensa que'l candidatu llorica nun tien ganchu electoral. Pal agresivu y faltón hai un públicu hooliganeru pero, pal llorica... ná, nun-y gusta a naide. La política mediática actual, espectáculu de gladiadores verbales inmisericordes, tien la cualidá contradictoria de prender emociones y, al empar, insensibilizar a la ciudadanía. La xente da por supuesto que'l que sube a esi ring conoz la regla que rixe'l combate: nun hai regles. Nun-y da más quién te quier putear, candidata/u anónimamente atacáu/ada. Interésa-y ver cómo te revuelves pa morde-y les narices al enemigu, o les ñalgues, si ye mui altu y l'agraviada persona pudorosa.

"El pensamiento libre supone una amenaza [?] para quienes llevan años viviendo de la política, [?] quieren ganar unas elecciones por vanagloria personal [?] y solo saben poner zancadillas a su alrededor." Cuesta pensar que se refiera Mallada a sigles rivales, por poner un casu, al PSOE. Nun veo a Barbón con capacidá de condicionar la llibertá de pensamientu o d'obra de naide dientro'l PP. La puñaladina queda pa en casa, p'algún profesional de la propia bancada que se niegue a garrar el retiru. Digo yo que nun será Cherines, que, por consagrase al partíu, renunció a "una situación preeminente en el ámbito de mis ejercicios profesionales como abogada, socióloga y politóloga", declaró la selmana pasada. ¡Joder, qué pena!

Pero la parte favorita mía del comunicáu de Mallada ye cuando pon: "Me he metido en esto porque creo que se puede hacer política de otra manera." Un poco más que se tuerzan les coses y escribe: "Me han metido en esto...". Pero, ¿en qué se metió? "En esto", diz: ¿a qué se refier col demostrativu neutru? ¿Por qué nun precisa? ¿Andará escasa de lésicu la candidata? Nomenón. Nun hai otra manera de decilo. Nun esiste sustantivu qu'englobe'l marabayu d'aspiraciones, traición, inseguridá, resentimientu y cobardía que gobierna al PP astur estos díes. Mallada bautízalo con puntería pero l'aciertu nominalizador nun basta pa ser la candidata que compite con posibilidaes reales. A Mallada, pa superar "esto", fálta-y... aquello.

Cola ayuda de la Conseyería d'Educación y Cultura del Principáu d'Asturies

Compartir el artículo

stats