–¿Cómo ye, ho? ¿Doite dolor de cabeza? ¿Yo?
–Sí, Canor. Y malestar estomacal, hiperventilación…
–Pero, Xulio…
-¡Atrás! ¡Atrás!
–¿Por?
–Yes un estímulo fóbicu, Nicanor.
-¿Que qué, ho?
–Téngote mieu. Y muncho.
–¿Tú a mí, ho? ¿Por?
–Yes un sobón.
–¿Yo?
–Sí, Canor. La interacción contigo ye una situación de riesgo. ¿Entiéndeslo?
–¿Qué me tas contando, Xulín? ¡Si nun te toqué!
–Ya, ya. A ver, igual ye un mieu irracional, pero siempre fuiste mui masuñón.
–¿Yo?
-Uf. Véote venir y… temo lo peor. Pa mí yes como los perros de Pavlov.
–¿Qué perros, ho?
–Sufro porque sé que quies abrazame, y dame taquicardia, mareos, sudoración…
–Pero yo…
–¡Atrás! ¡Atrás, Canor!
–¡Nun te pienso tocar, coño! ¡Nun te pienso tocar!
–Nun yes tú, Canor, soi yo.
–¿Que qué, ho?
–Soi conductista, Nicanor.
–¡Ah, coño! ¿Tovía andes col camión?
–No, home, no. El condicionamientu clásicu, ¿sabes cómo te digo?
–¿Qué, ho?
–¡Son muches hores de chigre contigo!
–¿Y?
–Que, tarde o temprano, nun te vas contener. ¡¡¡Vas metete por mí!!!
–¿Yo? ¿Meteme por ti?
–Sí, Nicanor, sí. Nun lo pues evitar, tú yes así.
–Cuantayá que nun mos vemos… ¡Andes escapau!
–Tengo mieu a los gérmenes, a les multitudes, al VAR, a les pites, a los yogures..
–¡Tranquilu, ho! Vamos tomar un vasín, ahora que volvieron a abrir.
–¡Déjame de vasinos! Nun soporto ser tocau por terceros.
–Yo voi en mitá la tabla...
–¡Atrás, Canor! Vas achuchame, vas restregate contra mí…
–¿Pero qué dices, ho?
–Téngote cariño, pero en pandemia yes un peligro.
–¿Yo? ¡Home, no me jodas!
–Sí, vas dir acercándote, vas abrazame, y vas jodeme les navidades.
–Escucha, ho…
–Yes así, necesites masuñar al prójimu pa ser feliz.
–Mira, ho. Voi de gel hidroalcohólicu talosgüevos y llevo mascarilla homologá...
–¡Ye igual, Nicanor, ye igual!
–Comparame a mí con unos perros, hai que se joder…
–Yes un peligro, aunque nun lo faes de mala fe.
-Así que doite dolor de cabeza, eh.
–Sí, Nicanor. Y malestar estomacal, hiperventilación…
