1.- El suscribiente, en comiendo, fai lo que nunca pensó, notru tiempu más preñáu de futuru, que diba facer: apigazar en sofá delantre la tele. Decadencia. Esa patética estampa ofrecía ún el pasáu llunes 1 de marzu, lluchando contra la gravedá con tola musculatura de los párpagos, cuando se m’infiltraron, na conciencia borrinosa que ronda ente dos mundos, tres afirmaciones sucesives, pingones del Panorama Regional. Y fueron les siguientes: 1: “Que se olvide la gente de fiesta.” 2: “El lavado de manos ha llegado para quedarse.” Y 3: “Los resultados académicos del curso pasado han sido los mejores de la década.” Sabrá usté, por esperiencia, qu’al país del pigazu les voces lleguen ondulantes, enxarellaes, entemecíes, asina qu’esti plumiante nun taba seguru nin del orde nin de la independencia de les tres sentencies. Podía ser que fueren parte d’una mesma noticia, d’un mesmu testu secionáu, de mala manera, pol amodorramientu. Por pone-y un casu: “Que se olvide la gente de fiesta: el lavado de manos ha llegado para quedarse.” Cuadrando semánticamente, la fusión de 1 con 2 pintaba un retratu desolador, polo porcayón, de la sociedá asturiana, un avisu infame, pesimista hasta pa un informativu del país. D’otra manera, la combinación 3-1 (“Los resultados académicos del curso pasado han sido los mejores de la década: que se olvide la gente de fiesta”) daba una imaxe irrealmente prusiana (optimista por demás, esta vez) del escolar autóctonu. Ún acabó enclinándose por casar 3 y 2: “Los resultados académicos del curso pasado han sido los mejores de la década: el lavado de manos ha llegado para quedarse”. Si usté nun ve cuántu sentíu tien la combinación, será que nun ye docente.
2.- Déxeme que, estos díes d’aniversariu pandémicu, rescate yo tamién una alcordanza personal d’aquel otru marzu de va un añu. Véome, el vienres 12, víspera de la suspensión de les clases, aburriendo cola Sintaxis de la EBAU a ciertu grupu de bachilleratu. Na primer fila, a un metru de distancia, tosiéndome como un xatu tuberculosu, tengo a Porreru 2. Hasta la selmana anterior, Porreru 2 sentábase na última fila, en compañía de Porreru 3 y de Gran Porreru, nuna especie de permanente pigazu comunal cannábicu al que llegaríen en sordina les mios impertinencies gramaticales (mutatis fumandis, como un servidor delantre la tele en comiendo, según quedó dicho arriba). Pero, dos díes enantes, corrió pel institutu la noticia de que la madre de Porreru 2 cayere víctima d’esi nuevu virus que, polo visto, cebábase, insidiosamente, en literatos (Luis Sepúlveda) y profesores (el xefe d’estudios del Masavéu, primer difuntu n’Asturies pola pandemia). Y Porreru 2 abandonó la proteción opaca de la mochila que ponía enriba’l pupitre allátrasones y avanzó hasta la vanguardia del aula, a un pasu de mi, y tosía, tosía cola bocona abierta, poníase coloráu de toser nun esfuerzu dignu d’un héroe aquéu asediando Troya. Y Troya yera yo, achapláu contra la pizarra, como un insectu al que l’anfiler-y busca’l tórax.
