Nestos tiempos de pandemia resintióse la nuesa sociedá. Resentímonos toos en munchos aspeutos de la vida: salú, estáu d'ánimu, duelos por seres queríos, inseguranza, soledá, angustia y falta de llibertá, ye tolo que dende hai un añu se pasia poles calles del mundu. Por estensión, lóxicamente, tamién se resintió la economía. Fueron munches les empreses que zarraron por nun poder facer frente a esta situación, sobre too los negocios dedicaos a la hostelería, al turismu, a la cultura en xeneral, espacios que lleven más d’un añu pesllaos o con aforos tan reducíos que nun-yos paga la pena abrir nin organizar nada.
Asina, la probeza amaga más que nunca per auquier. Ye verdá que se tán tomando midíes institucionales; nun voi a entrar a analizar si son suficientes, pero, lo que si ye evidente que, inda asina, les ONGs tán recibiendo cada vez más demandes d'auxiliu, y magar que lo ideal sería que nun tuvieren qu’esistir, que naide tuviera que pasar el tragu de pidir comida y otros productos, vese nesa situación y nun tener onde acudir ye mui duru. Les ONGs cubren unes necesidaes a les que nun lleguen les instituciones. Güei la probeza sufrímosla mui de cerca tamién nos países desarrollaos. Esta ye la realidá ante una situación inesperada y tan llaceriosa.
La cultura foi un de los sectores más afeutaos pola pandemia. Dende la Asociación d’Escritores d’Asturies, queremos aportar un migayu d'atención a esta situación de necesidá social, que nun tien visos de meyorar polo menos nunos años. Asina, entamamos la edición d’un llibru-discu solidariu, Instant.es, nel que participen 45 autores asturianos, con testos en castellán y n’asturianu y 21 cantautores que xenerosamente nos cedieron les sos canciones.
Los beneficios totales de les ventes van destinase al Banco d’Alimentos d’Asturies. Dende la lliteratura y la música que s’axunten nesta obra, queremos tener un xestu de collaboración con esta institución. La lliteratura siempre camina paralela a los momentos que viven los escritores, a les sos vivencies y emociones. Esti ye un momentu de sufrimientu social, de soledá, d’incertidume y de velea. De xuru que más d’un escritor espeyará esta situación nos sos testos. Tamos en procesu d’edición del llibru-discu Instant.es y tenemos entamáu un crowdfunding pa que la xente pueda aportar una ayuda a la edición d’esta obra, siempre con una recompensa, que s’esplicita na páxina: http://vkm.is/instantes. Namás hai qu’entrar nel enllaz y buscar les recompenses. Una forma de collaborar pa qu’esti llibru-discu vea la lluz y que podamos cumplir col oxetivu solidariu que nos propunximos. Ye guapo disfrutar d’esta muestra poética y musical Instant.es y facese cola publicación de forma anticipada. Quédennos pocos díes pa zarrar el crowdfunding y prestaríanos poder terminar el procesu.
Agradecemos daveres la vuestra collaboración.
