Con cada nueva llei d’Educación, paez que’l ramu da la vuelta como un calcetín, y d’eso nada. Lleo nos papeles novedaes de l’adviniente LOMLOE que nun lo son. Por exemplu, que los alumnos de Bachilleratu van poder pasar del primer cursu pal segundu con dos materies suspenses. Pues xusto como agora, cola LOMCE agonizante. Tamién, que van poder titular con una materia suspensa. Y tampoco eso ye novedá: el grupu de profesores de cada cursu de 2.º de Bachilleratu (la denominación técnica ye “equipu docente”) goza ya de la prerrogativa de perdonar l’asignatura trevesada acoyéndose (y acoyendo, benévolamente, al afectáu) a una dispensa o milonga (llámelo usté como quiera según se vea parte d’una humanidá renovada o profeta del final de los tiempos) denominada “madurez”. Si l’alumnu ta “maduru” pa ser universitariu o pa cursar un ciclu de grau superior de Formación Profesional, apártase-y de delantre, graciosamente, el suspensu fastidiosu. Nun ye llabor fácil dictaminar tal madurez, como usté entenderá. Igual el bachiller incompletu ta verde pa la Universidá pero, d’otru llau, podre ya pa seguir nel institutu. En fin, nestos casos, aplícase, con arrogancia, la prudente norma latina: “In dubio pro reo.” Decidir notru sen puede trae-yos a los profes reclamaciones ante la inspeción y rompederos de cabeza indeseables que, como poco, pueden tresferi-yos a ellos el papel de “reo” a la espera d’una sentencia onde nun se contempla’l conceptu “madurez” docente, por mui contrastada que pudiere tar. Resumiendo: tampoco va ser novedá facer la EBAU (y aprobala, que pa eso ye l’esame más fácil del mundu) con un tres de nota media n’Historia, Lengua o Física y Química. Lleo tamién que se va poder cursar el Bachilleratu en tres años, y camiento que debió haber problemes de comunicación al tresmitir esta “novedá” a la prensa. Actualmente, los alumnos disponen de cuatro años y faise raro pensar qu’un ministeriu tan contemplacionista como’l d’Educación, da igual qué partíu lu gobierne, vaya elimina-yos a los alumnos/clientes ningún tipu de facilidá. Albidra ún que la idea será permitir que dellos estudiantes puedan confecionar un programa a la carta de les materies del ciclu, reduciendo la carga mínima requerida pa cada cursu. LA NUEVA ESPAÑA publicaba qu’esta posibilidá va ofrecese a alumnos “que cursen estudios profesionales de música, que sean deportistas de alto nivel o que requieran una atención educativa diferente a la ordinaria”. ¡Atención a la tercer categoría! Esi sacu ye’l furacu negru que va sorber tol Bachilleratu (a algún gustara-y más el verbu “surniar”, viendo en qué van quedando estos estudios). Per esa puerta, en casu de necesidá o conveniencia, entramos toos, fáigame casu, que llevo 35 años nesti negociu. Si tien usté fíos n’edá escolar a los que nun se-yos pueda diagnosticar la conveniencia d’algún tipu d’atención educativa especial, preocúpese seriamente: dalgo raro pasa con ellos. Azote’l periódicu, apague’l móvil y salga corriendo, agora mesmo, a la gueta d’un orientador o un psicólogu de guardia qu’igüen esa imprudencia. Nun diga, mañana, que nun taba avisáu.
miliorodriguezcueto.wordpress.com
