El ciempiés

Rita: Tú mira pa’hí.

Roque: ¿El qué?

Rita: El ciempiés esi.

Roque: ¿Onde?

Rita: Los cures.

Roque: ¿Los que entren per la puerta en procesión?

Rita: Sí, esos. Mira qu’estolaxa.

Roque: Pa ser un ciempiés va derrangau a más no poder. Paez que i falten pates.

Rita: Va cad’un como i da la gana. No son quienes a estar unu juntu a otru como Dios manda.

Roque: Y que lo digas. No logren ponese d’acuerdu ni pa dir en orden pasillu alante.

Rita: Habíen de colocalos d’unu’n’unu.

Roque: Ya, pa que por llevar la contraria vayan de dos en dos.

Rita: Efetivamente.

Roque: Y mira aquelli: el que va saludando y sobando al primeru de cada bancu.

Rita: Jaz feu. Y no se está quietu, no. El fatu d’elli, ¿no parará con eses manes?

Roque: Va como un tibetanu templu arriba, rabilando cada molinillu d’oración que topa.

Rita: ¿Y esos sayones que lleven dalgunos per encima?

Roque: Son cogulles. Llámense cogulles.

Rita: ¡Madre, qué traces!

Roque: Ora engalánense asina: unos con normalidá y otros con cogulla.

Rita: ¡Eses mangones!

Roque: Muyer, ellos con tal de estar dividíos y de distinguise unos d’otros jacen lo que sea.

Rita: Mira, a dalgunos vénseyos los playerucos per debaju’l sayu.

Roque: Cálcenlos sobre tou los que tienen ya una edá. Depués de vieyos, gaiteros.

Rita: ¿Y aquelli co’l "patchwork" colgandoi del pescuezu?

Roque: Esi jue misioneru. Diz que i gusta seguir pusiendo la estola de colorinos que i tejieren exprofesu pa elli per onde estuvo allá’lantrones.

Rita: ¡Home, quita pa’llá! ¡Con tantu colorín enriba más que misioneru paez otra cosa!

Roque: No te pases, Rita. Por ciertu, ¿a ti paezti propiu el que besen l’altar jaciendo esi ademán con el anu cara’l que vien detrás?

Rita: Pa ná, Roque, pa ná. Vengo diciéndolo yo jaz tiempu.

Roque: Pues e verdá, dijístimilo cuando ti saqué el tema n’otra ocasión. No sé qué mi pasa: toi quedándome desmemoriau.

Rita: Ya ti lo noté yo, pero no ti diji nada. Hala, y ora estate calladín, eh, que da comienzu el santu sacrificiu.

Roque: Luego que no se mi olvide deciti lo de aquelli que no e pa cerrar el picu. Menudu cascabeleru …

Rita: ¡Chisss! Ciérralu tú tamién.

Suscríbete para seguir leyendo