Nos nuestros conceyos muchos nombres de sitios emprecipian per "jab-" (o, al poniente del Sella, pela so variante "fab-") y podíamos pensar que vienen de "jaba", qu'e como se llama nesti sen d'Asturias a las "alubias", pero dellos d'esos topónimos puen vinir sin embargu del vizcaín antigu "(h)abe", que quier dicir "árbol". Entós hai qu'enterase bien de si'l sitiu val más pa una cosa o pa la otra.
El 6 d'avientu pasáu'l nativu d'Asiegu (Cabrales) Pepe Mier Berridi enseñómi dende'l sitiu que-y llaman La Pica (cerca ya de la vega de La Mata) ónde ta la vega de Jabariegu, la más al poniente de Cuera (qu'e la llanadona llarga llena de jogos que va per Cabrales y Peñamellera del poniente al saliente, al merudía del monte altu que vemos de Llanes). Y ta claru qu'esa vega de Jabariegu llama l'atención porque tien fresnos a embute.
Esi día saqué una semeyanza d'ella y el casu e que casi no se ve porque la tapan los árboles. A Jabariegu diban pastores d'Asiegu, pero, según Máximo Blanco Fernández, qu'era d'esti pueblu, antiguamente los que subían eran de Puertas, otra aldea de Cabrales.