Como tema lliterariu, hai pocos más bayurosos que l'amor, que vien entetexiendo les sos cañes y espines cola historia de la lliteratura europea dende la época de los amurniaos trovadores.
Poro, nun paez mala idea pa un concursu empobináu a moces y mozos pidi-yos qu'escriban sobre él: van tener a la so disposición ferramienta poderoso. A lo menos, esto atalantaron el Conseyu de la Mocedá y la Oficina de Normalización Llingüística de Xixón, qu'entamen el concursu "Qué guapo ye querese" col enfotu de que los mozos d'ente 16-25 años escriban rellatos curtios en llingua asturiana sobre tema amorosiegu.
El concursu conlleva una reflexón sobre'l propiu fechu amorosu, como s'apunta yá dende les bases: "Pués querete a ti mesmu/a, a otra u otres persones y pués querer tamién a la to llingua [?] Pue llevate años querer a dalgo o dalguien o algamalo nun momentín. Querer implica tratase bien, igualar en drechos, nun facer de menos, quedase con lo qu'importa de verdá y non colo superficial, asoleyar los sentimientos de caún y caúna...".
El concursu divídese en dos estayes, 16 a 18 años y 19 a 25. Los escolinos de la primera, que cursen dende cuartu de la ESO hasta Bachilleratu, podrán emplegar los sos conocimientos alquiríos na clas d'asturianu, y la ayuda de los sos profesores, pa falar d'un tema bien antiguu y bien nuevu mandándose d'una llingua igualmente vieya y moderna.
El plazu pa la entrega de los rellatos acaba'l 21 d'avientu, y el premiu va entregase'l 21 de febreru de 2019, Día Internacional de la Llingua Materna.
