Les coses empezaron a camudar cuando, hai cuatro años, aportó Paz García Álvarez al institutu Aramo d'Uviéu. D'aquella había namás 13 escolinos de llingua asturiana en tol institutu, pero García Álvarez, que consideraba que l'Aramo yera un "institutu de referencia", pensó qu'había atopar una manera d'iguar la situación.
Asina decidiose crear una plataforma pa xestionar la necesidá por parte del alumnáu de visibilizar la llingua asturiana dientro del mesmo institutu y, según cuenta García Álvarez, los alumnos de bachilleratu garraron muncha conciencia llingüística y decidiendon facer por tresmitir a los sos compañeros d'escuela la importancia de la so llingua.
La preba del so bon facer ye que nos caberos cuatro años la matriculación de l'asignatura xubió un 553%, "pol sofitu del equipu y el bon facer del alumnáu".Crearon a lo primero un blog, al que diben xubiendo diversos materiales, y depués aportanon a Instagram y Twitter (@unaalumnadasturianu). Según García Álvarez, el blog ye perinteresante "pero ye un formatu que los críos nun consulten cuando van pa casa", mentes l'instagram ye "un mediu mui rápidu, que sirve pa deprender munchu vocabulariu".
Son estos medios los que más trabayen, y los cartelos qu'antaño se facíen con cartulines güei fáense con programes de diseñu y cuélguense nes redes. Esti tipu d'estratexes -como facer un exame per Instagram, emplegando un spinner como cronómetru- fai que los escolinos tean venceyaos dafecho al proxectu de la clas y, poro, nun ye estrañu que'l programa "Una alumna d'asturianu" siga funcionando cuatro años depués.
Si a esto sumamos vídeos en directo n'Instagram de vídeos rellacionaos col asturianu, hestories mui cuidaes y un claru compromisu col feminismu, ye difícil nun se decatar de que va haber "una alumna d'asturianu" demientres dellos años más.
