En cualesquier lliteratura hai obres imprescindibles y obres prescindibles. De les segundes podemos atopar munches porque esa ye la naturaleza propia d'elles. Son llibros qu'interesen al autor, pa satisfacer un currículu académicu o nun interesen a naide. Llibros que nun son pa respigar el pelleyu nin pa tresmitir sentimientos únicos. Hai llibros tan planos como les instrucciones de montaxe d'un mueble. Pela otra cueta, los llibros imprescindibles escasían porque apurren, a la lliteratura onde nacen, un desarrollu que tresciende de sí mesmos. Ciertos llibros de la lliteratura asturiana, castellana o inglesa algamen una significación pal corpus lliterariu d'esa llingua que sobrepasen los efectos de la mera llectura. Abren nuevos caminos, afonden en dalgunos caracteres nacionales o individuales, asitien a la lliteratura de que se trate nel escaparate estranxeru, inspiren otres obres artístiques, aguiyen a la escritura nes almes de llectores inquietos... Les razones son abondes y estremaes.

Y depués hai otra triba d'obres a les que na lliteratura asturiana nun se-y prestó suficiente atención no que llevamos d'historia de la llingua (más intensa, claro, nes últimes décades). Abúltame que davezu na nuestra lliteratura tiéndese a buscar la lexitimación de la obra imprescindible, de tal xeitu qu'andamos a la gueta eterna de la Gran Novela Asturiana, igual qu'al otru llau del charcu tenten a escribir y duldar sobre la esistencia de la Gran Novela Americana. Quien diz novela, diz Gran Poemariu Asturianu. Nel restu de xéneros lliterarios andamos más güérfanos de aparencioses querencies. Paeciera qu'hubiera un complexu involuntariu que nos obligara a escribir siempre pa la eternidá, alta lliteratura. Pero al llau de les obres imprescindibles y les prescindibles, tan les necesaries. Como Fabia, de Nel Morán. Cuido que nun pue haber una lliteratura madura ensin un bon baturiciu d'obres de llectura rápida, con ánimu de divertimentu, ensin más enquiz que'l llector pase un ratu entreteníu y escaecíu de la vida que nos atosiga. Lo que vien siendo o llamando lliteratura popular.

Asur aporta a Fabia encargáu por Dexter y Asociaos de desentrellizar la situación de ruina económica de la empresa farmacéutica que dirixen los duques de Santurrasu. Como nuevos accionistes, la firma encarga a Asur dellos trabayos desagradables, aquelles xeres que convién facer con discreción y ensin demasiaos escrúpulos. Recordóme'l personaxe d'Asur a aquel detective de Cosecha roja, de Dashiell Hammett, que llega'l pueblu ya igua tolos entuertos con determinación y chulería. Naquella novela había más violencia de la qu'atopamos en Fabia, muncha más violencia, pero'l mesmu cestu d'intrigues sentimentales, chantaxes criminales, diálogos cortantes y personaxes falsarios de toa condición. Naide paez inocente.

La novela de Nel Morán respuende a les característiques a esixir de cualesquier novela popular. Fabia ye una d'eses noveles necesaries pa la lliteratura asturiana: divertida, esaxerada, coñona, irreverente, dixestiva, delirante por momentos, absurda de psicoloxíes o trames, desbocada cásique dende'l principiu. Una novela pa lleer d'un tirón y depués dedicase a otra xera ensin empachu nin remolición. Ensin cayer nos furacos de la historia o na verosimilitú de los personaxes. La lliteratura popular busca enayenar de la realidá. Contar una historia, ensin moralines. Fabia cumple lo propio d'estes obres: facer pasar una bona tarde. Arriendes, participa tamién d'una utilidá que nun podemos despreciar, que ye sirvir d'entrada a la llingua asturiana. Pa quien de mano les filigranes estilístiques dificultaríen abondo l'aprendizaxe del asturianu al traviés de la llectura, la trama áxil, les estructures cencielles y la repetición de pallabres, qu'ayuden a memorizar léxicu pal que nun remana tovía la nuestra llingua (una obsesiva "carrapotada" repítese una y otra vez, asina como "fatu", "de nueves" y siendo los personaxes incapaces de dar un simple "besu" en cuenta d'un rebuscáu "chuchu"), ayuden a meyorar les competencies llectores y de conocencia del asturianu. Lo que ye probitú d'estilu n'otres obres, en Fabia ye un méritu. Lo importante ye lo que cuenta, non cómo lo cuenta. Intriga, amor, sexu, amistá. Vida. Esperemos que sía pa Nel Morán la primer novela de munches asemeyaes.