Pocos escritores na lliteratura asturiana tan dotaos pa la narrativa llarga como Xulio Arbesú (otros sedríen Xandru Fernández, Francisco Álvarez, Adolfo Camilo Díaz, David Artime o Manuel García Menéndez, por citar solo dalgunos con llarga obra o reciente). Pue detectase una falta triste de nomes de muyer, quitando dalguna escepción bien conocida, y de novelistes en xeneral. Un análisis más fondu sobre l'escasez de noveles n'asturianu requeriría mayor espaciu qu'una reseña. Poro, que s'espublice una novela, masque sía xuvenil como ye'l casu, nun dexa de ser una perbona noticia. Arriendes, la etiqueta de "xuvenil" nun va desmerecer la calidá de la obra, y too ello pol talentu creador d'Arbesú, que consigue elevar l'algame del testu pa que mayores y menos mayores esfruten igualmente d'él. El secretu son los personaxes bien dibuxaos, humanos y creyibles, asumibles na so inverosimilitú de seres de ficción nun contestu de ciencia ficción, grises na so concepción, lloñe de maniqueismos y complacencies. Esta vegada Xulio Arbesú cunta la hestoria d'una ciudá costera cualquiera onde toos queden quietos d'esmenu (persones, perros...), salvo Fran. El mozu descubre pronto que nun ye l'únicu. Bea, Iris ya Iván acompáñenlu nes sos esploraciones. Les posibilidaes inviten al vandalismu y nun les desaprovechen. Emburrien a ciclistes deteníos y a pasiantes xelaos que cayen de llau como estatues de cera, comen de lo qu'alcuentren nes tiendes y duermen nuna moblería. Beben cuanto quieren y lleen llibros que garren emprestaos o dafechu furtaos.
¿Qué asocede? Como nuna bona novela de misterios y aventures, y ésta ye tal triba de llibru, les razones poles que la ciudá apaez dixebrada de la realidá normal van siendo relevaes a poco y a poco. Nesto xuega un papel fundamental un yate estrañu qu'entra y sal del puertu deportivu ensin que los mozos sepan siquiera quién lu pilota. Los aparatos electrónicos nun furrulen pero dalguna cámara sí, y tamién dalguna televisión onde apaecen ellos nun siguimientu incomprensible. Pa complicalo too a mayores tenemos a Toni, un borrachu machista, faltosu y peligrosu pa la vida de los xóvenes, de quien habrán d'escapar al empar que busquen una salida de la ciudá. Un perru furiosu sueltu peles cais tampoco ayuda a la tranquilidá. Fran tien un carácter broncu y decidíu, y nun tarda en chocar cola intelixente moderación de Bea. En xeneral, los varones de la novela nun salen mui favorecíos (salvo'l casu de Canor, el vieyu que nun quedó quietu ensembre y ye quien pa mover los güeyos nun sentíu o otru), mientres que les femes amuesen valentía, lucidez y prudencia.
Na ciudá pantasma pue lleese darréu, ensin parar. Cada capítulu lleva al siguiente y Arbesú ye consciente de la so capacidá pa pañar de la mano al llector y dexar que la fabulación corra llibre anque arreguerada. La novelística de Xulio Arbesú suel caracterizase precisamente por esa oralidá soterraña qu'invita a lleer los sos llibros cola llixereza de quien escucha una cuentu a la lluz de la llume llariega. Les emociones de los personaxes son tan comunes como'l llector, ensin que sía deméritu esta falta de escentricidá que tan habitual ye na lliteratura. Arbesú nun necesita personaxes estravagantes, sinón que gusta d'asitiar a cualquiera que pue afayase nuna situación abegosa pa construyir la narración. Paez que l'autor se preguntara: ¿qué fadríen unos chavales si s'atoparen de sutaque colo imprevisto ya increyible? ¿Y si queden solos nun yate mientres el mundu esbarrumba? ¿Puen fiase d'un home violentu y vengativu que quier retorcigaña-yos el pescuezu? La estructura formal de la novela, tan propia de la narrativa decimonónica, da un xiru inesperáu y guapu al final del llibru, cuando descubrimos que lo que tamos lleendo ye lo qu'ún de los protagonistes escribe sobre los asocedíos na ciudá pantasma, de tal xeitu qu'apreciamos una estructura circular onde la hestoria ficticia y la realidá llectora de quien sostién el llibru nes manes funden nuna sola y única realidá. Ye inevitable pa mi nun alcordar de Leviatán, la novela de Paul Auster na que'l llibru del que falen na novela ye'l mesmu que'l llector ta lleendo. Un misteriu más resueltu nesta entretenida muestra de bona y prestosa lliteratura.
