La diferencia ente Francia y irán procede de les facultaes d'Humanidaes, non de les científiques nin técniques. Tolos cursos-yos los repito a los alumnos de Bachilleratu en clase de Lengua, anque nun sé bien por qué. A fin de cuentes, ¿qué más me da a mi si la Europa de 2100 se gobierna por preceptos coránicos o a la lluz del racionalismu? Y, como promoción de los estudios universitarios de lletres (otra causa cola que tampoco tengo claru'l compromisu), l'argumentu nun tien muncha pegada nestos tiempos de pragmatismu titulista engañosu, ilusoriu.
Hai veces que recurro al modelu a imitar:
-Daivos cuenta: los que gobiernen el mundu, polo normal, estudiaron Sociales o Humanidaes. El primeru, Obama.
-¿Y Mariano Rajoy?-interesóse una rapaza'l cursu pasáu.
Reculé al argumentu franco-iraní.
Estos díes, pasando les fueyes del periódicu, dime cuenta de que los mios esfuerzos promocionales son menos convincentes que la realidá. Si los alumnos leyeren la prensa, igual descubríen que'l campu de batalla del poder municipal n'Ovieo ye la conceyalía de Cultura. El responsable, Sánchez Ramos, "Rivi", ye diana de tolos dardos y mosqueteru que cruza florete contra cien espadachines enemigos, igual que-y pasare enantes, nuna situación idéntica anque nes antípodes polítiques, a Carlos Rubiera en Xixón. Nos dos casos, un partíu que se creía insustituible alcontróse, de golpe y porrazu, amortizáu pa una mayoría de ciudadanos, y el consecuente berrinche, d'otra manera natural y humanamente comprensible, buscó facer lleña, de manera específicamente violenta, nes respectives conceyalíes de Cultura y Fiestes. El PSOE de Xixón fartucóse de presentar a Rubiera como un aldeanu destructor d'una política cultural heredada d'ellos y abierta al mundu cola que s'autorretrataben; el PP carbayón acusa a Sánchez Ramos d'arruinar, con vesania vengativa, un enxareyáu de fiestes qu'ellos dexaron engrasáu y funcionando. El deán de la Catedral hasta llama a Rivi incultu y desinteresáu pol arte: más gordo nun se puede decir del titular de Cultura.
Lo de menos, nel presente argumentariu, ye si los protestones tienen razón o si berren por vese desplazaos d'un poder que sentíen como propiedá privada. Interésanos que'l protagonismu d'estos conflictos cai, anque fuere de manera tanxencial, nominal, nel ámbitu de la cultura. En realidá, sabemos que polo que se peguen ye poles fiestes. L'amu de les fiestes moviliza mases humanes, reparte alegría y gana voluntaes. La conceyalía de Fiestes, colos sos conciertos, los sos chiringos y la so cabalgata navideña, ye l'escaparate políticu pa una bona parte de la población anestésicamente desinformada pola Liga o les tertulies de calzón y braga arriaos. Casi puede decise que la parte de Cultura del cargu ta de más, ye cosa intrescendente, porque, a fin de cuentes, el cacharru del chiringu bébenlu, lo mesmo, la doctora en lleis que l'acólita de Tele 5: la folixa ye más democrática, si por democrática entendemos igualitaria a la manera del sistema educativu: per baxo.
Un conceyal de Cultura, hoi, tien que ser incombustible por ignífugu, irrompible, indeformable, inamovible y al empar imparable, inafogable, incomible pero tamién imputrefactible, tresparente pero visible, ubicuu y, a poder ser (pero esto ya ye un extra), cultu. Eso nun hai material, inventáu por un científicu y desarrolláu por un técnicu, que lo dea.
