«Cancioneru de la gaita asturiana», la lletra del nuesu símbolu musical

Como bien se señala na propia edición, el primer volumen desti cancioneru revisa y da repasón a les fontes afayadices d'aniciu medieval y con documentación en monumentos y alministración dende'l sieglu XIII que pue rastrexase al traviés de delles dómines de la propia Hestoria. Encontando neses fontes los dos llibros desti cancioneru novalín proponen una hestoria que presenta de mou bultable el protagonismu que tienen los gaiteros -míticos y de recién- y los artesanos luthiers amás del enfotu de la xente asturiana que, magar tolos camudamientos sociales ya influencies estétiques y culturales, caltuvieron n'usu la gaita xerenación tres xeneración, allegando a da-y un valir patrimonial y a convertila en símbolu musical d'Asturies. Música pa la vida comunitaria, el cantu, el baile y los cortexos y festexos cívicos y relixosos y siempres cola gaita bien presente.

D'otra parte, el volume denomáu «Partitures» percurre toes les etapes de creación musical de la gaita asturiana con una collecha de partitures col envís d'ufrir a los interesaos, musicólogos, escolinos ya inclusive gaiteros péritos y avezaos la posibilidá d'afayar amezao un material musical únicu qu'hasta anguaño taba arramáu masque aínda nun ta peracabáu. Apaecen, d'entamu, referencies al «Cuaderno de canciones españolas» (1845) nel que Mijaíl Glinka encaxetó una xota asturiana. D'entós p'acá, delles personalidáes enfotáronse n'asoleyar los primeros cancioneros y álbumes pianísticos de raigañu ástur apurriendo material piqueru pa los cancioneros que llegaron hasta la Guerra Civil. Nel entemediu d'eses dómines de relación, estos dos volúmenes señalen a Eduardo Martínez Torner, qu'anició col míticu «Cancionero musical de la lírica popular asturiana» la etnomusicoloxía asturiana trescribiendo sones de gaita per primer vegada y ensin l'acompañamientu de pianu. Y tamién el llabor encorsetáu y singular de la etapa franquista qu'avideció llueu pol aciu d'agrupaciones, colectivos folclóricos ya investigadores del resurdimientu cultural tradicional asturianu qu'afitaron el repertoriu de les xeneraciones vinientes de gaiteros y que cuenta pa ello con otros trabayos señalaos, llibros y cancioneros cola firma de mayestros como Xuacu Amieva, Daniel García de la Cuesta, Flavio Benito, Guti, Ricardo Soberado, Balbino Menéndez y otros.

Les 262 páxines del volume «Historia y usos» cuentan con presentación de Lisardo Lombardía, direutor xeneral del Festival Intercélticu de Lorient, y el testu «Los ámbitos de la gaita asturiana» lleva firma del escritor Ignaciu Llope, de la Fundación Belenos. Notes al rodiu de los anicios de la gaita, datos de gaiteros asturianos ente los sieglos XV y XVIII, otros tocadores d'oficiu, artesanos facedores, el modelu tradicional de gaita asturiana, la perceición social del gaiteru, los usos tradicionales del instrumentu (fiestes, cantos, guilandos y mazcaraes d'iviernu, casorios, funerales, segaretes, feries...) y les anovaciones del sieglu XX (concursos, bandes, grupos) rematen con una bibliografía detallada y enllaces lletrónicos y una perguapa collecha de planos de gaites antigües feches por «Galfarro», «Firme», «Maquilo», Antón de Cogolla, Marcelo Fresno, José «La Piedra», «Pachu Turón», Pombo Salgado, Faustino Menéndez, Ablanedo Riesgo, «Sebrayu», Fernández Rivero «el Silleru Caravia», «Margolles», «el Ciegu Tresgrandas», «Pepe Requejo» y dalguna anónima. El complementu imprescindible del primer llibru cuenta tamién con una montonera impagatible de semeyes de colleición qu'espeyen esta historia de la gaita (gaiteros y artesanos) asturiana con retratos, romeríes, pasucáis, cuadros de muséu, pliegos, documentos, retablos, sillares o cartelos de publicidá. Les 620 páxines del volume «Partitures» abre coles fontes pa la conocencia del repertoriu y los xéneros (dances, bailes a lo suelto, fandangu asturianu, xota, lo llixero, la muñera, corru, agarraos, pericotes, repertoriu de Remis Ovalle, repertorios relixosos de misa y entemedios, marches, sones cantariegos y anovaciones dende los años ochenta). Sigui colos criterios d'edición (trescripción, téunica, autoría) y delles fiches téuniques.

Estos dos volúmenes del «Cancioneru de la gaita asturiana» son obra del mayestru gaiteru Eugenio Otero, fundador de la campeona Banda Gaites Llariegu y dende 2003 profesor de gaita na Fundación Municipal de Cultura de Siero; de Fonsu Fernández (direutor del Muséu de la Gaita), mayestru gaiteru y zanfoneru, autor de dellos discos propios o con «Lliberdón» y estudiosu y despardidor del folclore asturianu, y de Gausón Gutierri, miembru de la Fundación y Colectivu Belenos, articulista de la revista «Asturies, memoria encesa», péritu na hestoria de gaiteros asturianos y autor de «El paxellu asturianu o el traxe'l país».