Dientro de los topónimos de Xixón, el de La Barquera pertenez a la dómina más antigua, a la época de la fundación de la ciudá. Dio nombre a una plaza, a un pozu, a una capiya antigua, a un santu de la Colexata, a una fuente y a una rambla de la zona de Cimavilla.

El declive de La Barquera entamó a finales del XIX, cuando se treslladó la fuente de «Los papos», o de La Barquera, a la plaza'l Carme -nun primer términu-, y colocóse nel so sitiu la primer estatua de Xixón: la de «Pelayo», en 1891; finalmente cambióse oficialmente'l topónimu de la prazuela, que pasaría a llamase plaza del Marqués. Pero yera un topónimu tan arraigáu que tardó en perdese; por exemplu, hasta la Guerra Civil mantúvose, nel templu de San Pedro, el retablu de la capiya conocida popularmente como de La Barquera, destruíu totalmente xunto cola ilesia.

De los tiempos de la romanización, concretamente del sieglu III al IV dempués de Cristo, llantábase equí -xusto delantre del palaciu- una importante factoría de salazones, como confirmen escavaciones relativamente recientes.

La fontasca fue inaugurada en 1669 -daqué anterior al palaciu del Marqués de San Esteban, que ye de 1690-, y llamóse tamién de «Los papos», por unos anxelotes que parecíen apuxar por sacar l'agua qu'habría de surtir les necesidaes de los marineros y pescadores de la cercana dársena. Consérvase en dalguna semeya de la época la popular fuente y a una muyer sacando agua.

Preside la plaza'l famosu palaciu, de elementos barrocos y góticos, que tien adosada a la so torre del este la colexata de San Juanín de la Barquera, de llarga tradición na ciudá. Al pie, la rambla de La Barquera, que se mantuvo viva hasta l'actualidá ente los vecinos de Cimavilla, como recuerda l'autor playu Nicieza Ovies.

Al otru llau de la plaza situábase la capiya de dichu nombre, obra del canteru Xuan de Güemes de Bracamonde, costeada pola familia de Alonso Ramírez Llanos y la so muyer, María de Xove Argüelles nel añu 1626; vendida por estos a los Álvarez Teyera, habiéndose encomendao'l trabayu d'instalación y reforma del retablu al escultor José María Álvarez. Nella venérase la Natividá de Nuestra Señora. A finales del sieglu XIX ye treslladáu'l retablu como capiya d'ánimes a San Pedro a causa del derribu de la capiya.

Esta plaza yera cásique la más antigua de la ciudá, quiciabes xunto cola de la Soledá, qu'acoyería seguramente les corríes de toros qu'hubo en 1660 na ciudá. La plaza yera un burdel de xente que diba y venía, pero, según Ovies, enxamás fue pa los pescadores de Cimavilla muelle de Ribera: «Tenía otru aire, faltába-y sal marinera, con gabarres, barcos costeros, veleros y embarcaciones (...). Yera tranquila, non vocinglera, siempre señoritanga y dominguera, n'iviernu varaderu de botes y lanches, con xente marinera. Un sitiu ideal pa echar mareaxes (...)». Na so opinión, la Colexata y la estatua de Pelayo marcaben frontera, yeren una llinia invisible hasta onde llegaba Cimavilla.

La significación histórica de La Barquera fai referencia de la domina en que la ciudá afayábase separada de tierra firme, a lo menos cuando subía la marea y una llingua de agua dividía L'Atalaya -Santa Catalina-, convertida nuna isla, del restu de terrenu, qu'estaría más retrancáu qu'anguañu. La Barquera ye'l rastru que dexa sobre la toponimia la esistencia d'un serviciu de pasu de persones y coses hacia la isla o viceversa; la barca que facía'l pequeñu recorríu nun yera otra cosa que la famosa barquera.

La desaparición oficial del topónimu nun causó, que se sepia, y desgraciadamente, gran pesar ente los xixoneses. Amás ésti yera sustituíu por el señor Marqués, que nun yera cosa de retrucar. Apoyaba, en xeneral, la sustitución de la topónimia l'asturianista y espertu en Xove-Llanos Julio Somoza, y el so «escuderu» Emilio Robles, «Pachín de Melás», quien contesta a una pregunta retórica suya que hai qu'actualizar el caleyeru de la ciudá; una idea d'actualización que queda lloñe de lo qu'entedemos güei.