La pronunciación de la je, que pa mí e la consonante más antigua y la que más val del asturianu, siéntese al saliente d'una raya que pasa pelos conceyos de Ribesella (solu parllaban cola efe los vecines del pueblu de Berbes) y Parres, pos los d'Amieva jablan cola je y los de Ponga cola efe.

En conceyu de Parres dicía la je la xente de los pueblos y caserías d'Arenes, Los Tucones (una casería d'Arenes), Avalle, Bada, Cayarga, El Colláu l'Andrín, Deu, Gustarnales, Juentes, El Befar, Llau, Misariegos, Peñellana, La Roza Parres, Samartín de Bada, San Xuan de Parres, Sinariega, Carrizal (casería pameque de Sinariega), L'Eru Combu (Sinariega), Gustazán (de Sinariega, pa mí), Sobrepiedra, Sotu Deu, Torañu (col barriu de Teyúa y la casería de Torañu), Tresmonte, Baries (Vallubil), Vallubil y La Vega los Caseros.

Los sitios de la efe son Andeyes (La Vita), Les Arriondes (qu'e la capital del conceyu), Bode, La Llana (Bode), La Llosona (Bode), La Valleya (Bode), La Vega (Bode), Bodes, Calavera (casería que ta ente los conceyos de Parres y Ribesella), Carriu, Carúa, La Cabaña (Les Caseríes), Les Caseríes de Baxu (Les Caseríes), Llabayu (Les Caseríes), San José (Les Caseríes), Castiellu, La Cabañina (Cibidiellu), El Colláu, El Farricón de Arriba (d'El Colláu de Santo Tomás), Collía, Les Corones, Cuadroveña, La Faeda (Fresnidiellu), La Gobia, Granda, Güexes, Llames, Llerandi, Montalea, Ozanes, Pendás, El Codiadiellu (Pendás), Priaes, Romiyín, Romiyu, San Andrés, Sotu Dueñes, El Terrón, Tospe (col barriu d'Aboín), Valdeladuerna, Villanueva de Fíos y Viriu.

En pueblu d'Arenes doce presonas dixérenmi que mandaba la je, dos d'ellas eran muyeres nacías en 1902; términos d'esti pueblu son los qu'equí van: Los Jondrigos, La Llosa la Juente, La Juente de Baju y La Juente d'Arriba, La Juentina, ajogase, ajogóse, enjariñase, enjileráu, enjocicase, jacer, jachu, jariña, «la je», jelechu, jila, jortiga, jortigase, jortigues, josoria, joz, juí, rejastiáu, «aquí en este pueblo por aquí se pronuncia más la jota que la efe», «jigos» y «figos»: «voi a jigos», «aquí hablábase mucho de la jota: "jacer" y "jame", "jartura", todo eso sí; hablábase antes de la jota; "jabes", tou eso, todo era la jota, sí, después fuimos metiéndomos unos y otros que veníamos hablando de la efe, y entonces ya casi se coincidió el hacer la efe». Enjileráu «e llamar "cosíu"», mientras que enfileráu «e en filera, ponerse en filera».

N'Arenes tamién puen jallase testimonios de la efe: «enfoscáu, de una paré», «taba muertu fame», «el mio de Fulanu», refastiáu (pallabra dudosa), «una retafila de gente iba por San José a Covadonga, o una retafila de vacas», La Fae, La Fuerasaca, Valdelesfaes.

En tolos pueblos de Parres la xente dicía los femeninos plurales cabaos en -es, no pasa como en Llanes, Cabrales, Onís y otros conceyos d'esti sen onde se dicen con -as.

Estos datos vienen d'un llabor que jeci en 2009 cola ayuda de la Conseyería de Cultura y Turismu d'Asturias.