Pablo Quiroga Prendes (Candás, 1978) ye un realizador audiovisual y maestru de llingua asturiana. Autor de títulos emblemáticos del nuestru audiovisual como'l curtiometraxe de terror "Bisarmes" o'l llargumetraxe documental "Seliquín-Xentiquina. Una ferramienta pedagóxica al serviciu de la escuela n'Asturies", n'agostu d'anguaño impartió un cursu de cine na Universidá Asturiana de Branu, en Cangas del Narcea. El cursu tenía l'oxetivu d'averase a la realidá de la producción audiovisual n'asturianu al traviés d'un percorríu peles películes y los curtiumetraxes fechos na nuestra llingua, amás de conocer y facer un proyectu específicu de realización audiovisual. Too ello cola idea de que los maestros puedan aplicar los conocimientos algamaos pa usar el cine como material pa les clases d'asturianu.
-¿Cómo puen utilizase los materiales audiovisuales nes clases?
-Pa mi hai dos maneres d'utilizalos. Les dos bien válides, anque yo siempres animo a tol mundu a usar la segunda. La primera ye la fácil, ye proyectar un curtiu, una peli o una serie de dibuxos y trabayar con ella, sacando d'esa proyección un aprendizaxe, bien sía en forma de palabreru, de xiros llingüísticos, de conceptos culturales diversos, de comportamientos humanos? Vamos, tolo que pueda sacase d'una peli si trabayamos d'una forma educativa y nun solo como entretenimientu. Curiáu que lo de ser productu d'entretenimientu ye esencial, y lo importante en tou esto ye motivar al alumnáu a consumir productos na nuestra llingua. La segunda ye más complicada, pero namás porque lleva un pocoñín más de trabayu y esfuerciu; tratar de facer los nuestros propios productos audiovisuales nel aula. Partiendo d'una idea, inventar una historia, construir un guión y rodalu. Hai que tener en cuenta siempre les llimitaciones horaries y materiales que vamos atopar, pero yo creo que ye una práctica que va llamar muncho l'atención d'un alumnáu cansao de la rutina de les clases de siempre.
-¿Cómo trabaya usté nes clases la realización d'audiovisuales?
-Otros cursos facíemos un trabayín fácil al final del cursu con tolos niveles xuntos, de primeru a sestu -dalgún añu n'infantil tamién-. Por exemplu, un spot p'animar a la matriculación nes clases de primaria, un vidiu pa saludar a otros coles, dalgo rellacionáu col cantar del vasu? Esti añu, el mio planteamientu ye dir un pasu más alantre y trabayar colos cursos superiores dende'l principiu con una programación marcada por un contestu audiovisual. Vamos trabayar tol currículo de Llingua Asturiana y Lliteratura pero al traviés de xeres didáctiques que nos permitan crear, clase per clase, un producto audiovisual que poder mostrar al resto de la escuela al final de cursu.
-¿Qué material ye necesario?
-Na nuestra escuela contaben con mercar una cámara de vidiu pa poder facer usu dende toles árees. Eso, anque tamién nos val una cámara fotos, un móvil o una tablet, xunto con un ordenador y dalgún programa cenciello pa xunir los cachinos de vidiu. Ye lo más complicao que podemos necesitar. El resto ye cosa de dir creando un guión dende les clases y pa eso cola llibreta valnos de sobra.
-¿Cómo reciben los escolinos estes iniciatives?
-Pues recibenlo con una motivación enorme. Presta-yos pola vida ver que'l so trabayu na clase de llingua asturiana pasa les llendes del aula. Depués, si los vidios tan en youtube y ven que'l númberu visites xube día a día nun te cuento nada. Los escolinos quieren trabayar con materiales visuales y ser participes de la so creación ye un plus, como si fuere un regalu.
-Esti añu entamó un cursu de cine na UABRA ¿Cómo recibieron los maestros matriculaos la iniciativa?
-Diben con un poco d'escepticismu, como si pensaren que yera realmente difícil llevar lo qu'ellí planteabamos a les sos aules de primaria o secundaria. La selmana escasa que tuviemos trabayando distintos aspectos de la creación audiovisual, dende la construcción de personaxes al traviés de los exercicios d'actuación y guión con María Cotiello, los exemplos visuales que nos presentó Loreto Díaz o la parte de producción y dirección que pudiere dar yo, sirvió pa desmitificar la dificultá de llevar esto al aula. Bien ye verdá que igual necesitaríemos dar un cursu d'un llargor un tanto mayor. Too ye planteable.
-¿Faen falta más productos audiovisuales que puedan utilizase como preseos nes clases d'asturianu?
-Nun tenemos materiales infantiles, sacantes casos aislaos como "Los Bolechas" o "El Faru d'Iyán". Les maestres y maestros vémonos faltos de recursos colos que poder trabayar. D'ehí la mio insistencia en dir creando materiales propios y nun parase namás a consumir lo que tengamos. Sicasí yera fundamental que la RTPA nos echara un gabitu nesto. Nun ye tan complicao, ya nun digo crear un programa infantil o una serie, que yera lo suyo, sino facer como con "Los Bolechas" y tirar de doblaxe de coses que funcionen y funcionaron fuera d'Asturies.
