La música en directo tien algamao un papel central nel ámbitu cultural nos últimos años y Avilés, como otres munches ciudaes del nuestru entornu, enfréntase a una serie de desafíos tocante a esti asuntu que convién abordar dende toles perspectives posibles. De mano, hai que tener en cuenta los cambios fondos y estructurales que sufrió'l mundu de la música, tanto nel aspectu creativu como nel industrial, na última década. Nesa tresformación incidió de manera bultable la crisis de la propia industria musical y la crisis económica de calter xeneral d'estos años. Too ello llevó a un modelu nuevu, distintu, na manera de rellacionase ente creadores, industria y públicu. Esti modelu nuevu concrétase fundamentalmente nuna vuelta al gustu, la necesidá y la demanda de disfrutar de la música en directo de toles maneres y formatos: dende los grandes conciertos a les actuaciones en sales medianes o pequeñes y tamién en locales d'hostelería como bares o pubs. Precisamente podemos observar cómo dende hai un tiempu son cada vez más los establecimientos que diversificaron la so ufierta pa dar respuesta a les inquietúes de los sos clientes, y tamién como reclamu p'atrayer otros nuevos y garantizar la viabilidá del local. Prueba d'ello ye l'aumentu del númberu d'establecimientos qu'acueyen conciertos, amás d'esposiciones, presentaciones de llibros, xornaes lliteraries o representaciones teatrales, por poner dellos exemplos.
A too ello nun ye ayeno Avilés, que tamién s'axunta a esta tendencia que nun fai más que realzar la ufierta cultural y la imaxe de la nuestra ciudá. El problema vien cuando esta realidá entra en contradicción cola llexislación en vigor, yá qu'estos establecimientos nun disponen de la llicencia como sala de conciertos. Técnicamente son consideraos como bares y asina alcuéntrense nuna situación indefinida y nos márxenes de la llegalidá, esponiéndose a sanciones y multes. Por ello, dende hai un tiempu, promotores, artistes y hosteleros xuntáronse pa pidir la modificación de la llexislación nesta materia y permitir qu'esti tipu de locales puedan programar música en directo ensin un permisu espresu, siempre n'horarios responsables. La crítica principal ye la dureza de la llei vixente anguaño, qu'esixe una llicencia específica y tener el local insonorizáu dafechu, lo que supón un coste demasiáu grande pa munchos d'ellos. N'Asturies la normativa autonómica aplicable ye la Llei 8/2002 d'Espectáculos y Actividaes Recreatives y el Decretu 91/2004 del Catálogu de los Espectáculos Públicos, que discriminen a la música en directo frente a la denominada "música amplificada" (la emitida al traviés d'aparatos reproductores), prohibiendo la primera en locales d'hostelería (bares, pubs, chigres, restauranes, etc) y esixendo un umbral d'aislamientu acústicu mayor. Por ello ye necesario modificar la llexislación pa qu'estos establecimientos que por una razón o otra nun tienen llicencia pero, que de fechu, organicen conciertos, puedan tener cobertoria llegal, ye dicir, dotar de garantíes a estos locales singulares. Faise imprescindible cambiar l'actual llei autonómica pa que los conciertos, agora trataos como espectáculos, pasen a tener una consideración asemeyada a la de la llamada música amplificada.
Per otru llau, dende Somos Avilés, creyemos qu'hai que desarrollar una normativa municipal que, col consensu de tolos sectores implicaos (hostelería, músicos, colectivos culturales, representantes políticos y vecinales y técnicos) permita l'autorización d'actuaciones artístiques de formatu pequeñu nestos locales y acabe cola so situación d'indeterminación xurídica actual. Respetando, por supuesto, en tou momentu, el derechu al descansu de los vecinos y vecines. Y ello porque, nel nuestru ámbitu local, namás tanxencialmente se trata esti tema na Ordenanza Municipal sobre Ruíos y Vibraciones, que n'artículos como'l 18, 19, 36, 43 o 44 falen fundamentalmente de los niveles sonoros máximos permitíos (onde se cita testualmente a "locales con música o canto en vivo"), de los equipos musicales y de les llicencies pa la so instalación, amás de les prohibiciones establecíes, consignando de manera xenérica que podrán ser dispensaes "en la totalidad o parte del término municipal por razones de interés general o de especial significación ciudadana", estipulando tamién que "los ensayos o reuniones musicales, instrumentales o vocales, bailes o danza y las fiestas privadas" han atenese a lo establecío nesta normativa. La ordenanza ye del añu 1992 y resulta claramente insuficiente, dexando nuna llaguna llegal tolo relativo a la música en directo nel nuestru conceyu.
Otra manera, yá fuera de los aspectos llegales, creyemos que la escasez d'ufierta cultural llevó a la nuestra ciudá a la cásique desapación del mapa del ociu nocherniegu, con tolos perxuicios qu'ello conlleva. Entendemos que la programación entamada dende la Conceyalía de Cultura nun ta reñida col fomentu y la promoción d'estos conciertos y actuaciones de pequeñu formatu y de calter autoxestinariu, onde los protagonistes son fundamentalmente artistes avilesinos que tienen nello una mui bona manera de dase a conocer. La cultura de base y l'ambiente qu'esta xenera son anguaño dos factores clave na promoción d'una ciudá y na so calidá de vida, polo que nos paez que l'Ayuntamientu nun tien que desentendese d'esta cuestión, involucrándose activamente nella. Un primer pasu dióse nel últimu Plenu al aprobase, por unanimidá, una moción na que se pidía instar al Gobiernu d'Asturies pa qu'inicie y/o axilice la modificación de la normativa que regula'l Catálogu d'Espectáculos y Actividaes Recreatives, col oxetu de permitir que nos locales d'hostelería puedan desarrollase actuaciones en vivo. Amás, l'equipu de gobiernu comprometióse a revisar la normativa local sobre esti tema y adecuala a la realidá existente anguaño.
Pola nuestra parte tamos enfotaos en que con un debate rigurosu sobre'l tema pue llegase a una solución de consensu que permita ampliar y complementar d'esta manera los circuitos convencionales y comerciales pelos que discurre la ufierta cultural. L'ociu, l'actividá económica y el dinamismu social van de la mano nesti tema; trátase de facer, en definitiva, un Avilés más vivu y atractivu.
