El Conceyu d'Allande ta trabayando pa consiguir la certificación de “conceyu Starlight”. Trátase d'un sellu de calidá qu'asitia al llugar que lu llogra como un puntu nel mapa nel que puede esfrutase de la contemplación de los cielos estrellaos, cola seguridá de que nun hai contaminación lluminosa y de que ye un sitiu afayaízu pa desenvolver actividaes que tean basaes nel esfrute del firmamentu. 

El conceyu allandés entá ta dando los primeros pasos nesti camín, cola aprobación, nel postreru plenu, de l'adhesión del conceyu a la "Declaración sobre la Defensa del Cielu Nocherniegu y el Derechu a la Lluz de les Estrelles”. Nella detállense 10 oxetivos pa protexer el mediu ambiente nocherniegu y “l'accesu a la lluz de les estrelles”, daqué que, según asegura la mesma declaración, “ta deteriorándose en munches zones y la so contemplación ponse cada vegada más difícil, lo que nos enfrenta a la perda xeneralizada d'un recursu cultural, científicu y natural”. 

La iniciativa d'esti conceyu del suroccidente asturianu de ver nel so cielu un recursu que pueda aprovechar como interés turísticu surdió esti branu, a partir de la celebración del proyectu de divulgación científica “Allande Stars”, que mientres trés díes del mes d'agostu llevó actividaes rellacionaes cola astronomía a dellos puntos del conceyu, incluyendo dos nueches d'observación d'estrelles dende puntos altos como son el puertu del Pozo de las Mujeres Muertas y l'altu de La Marta. El proyectu afalólu la moza allandesa Lucía González Cuesta, investigadora pre-doctoral nel Institutu d'Astrofísica de Canaries y monitora Starlight. 

“L'entusiasmu qu'espertó l'actividá per parte de la xente motivónos a trabayar nello. Llamónos l'atención qu'una tema científica, qu'en principiu nun tien que ver colo cotidiano de la xente, espertara tanto interés”, reconoz l'alcalde, José Antonio Mesa, que cree que'l cielu puede ser un atractivu p'Allande. “Tenemos el problema de la despoblación, pero, per otru llau, esto tamién favorez que tengamos un cielu que nun ta contamináu, lo que fai que podamos facilitar la observación a la xente que se dedica a ello”. 

La investigadora Lucía González collabora nel proyectu col Conceyu pa empresta-y asesoramientu na materia y ayudar a entainar los trámites cola Fundación Starlight. Ella mesma reconoz que mientres la celebración de les xornaes de “Allande Stars” atopó con participantes que practicaben la astrofotografía que se quedaron ablucaos col cielu allandés. 

“La baxa densidá de población y la escasa contaminación llumínica converten a Allande nun llugar amañosu pa la observación del firmamentu”, sorraya. Amás, añede que “l'Astronomía siempres tuvo presente nel nuesu conceyu, guardando estrecha relación cola tema del campu, el patrimoniu y la cultura, polo que ye importante protexer y valorar la calidá del cielu que tenemos, que puede ser un recursu natural importante gracies al turismu astronómicu”. 

Tres l'adhesión del Ayuntamientu a la declaración, el conceyu va tener que sometese a los analises de la Fundación Starlight pa comprobar que cumple colos parámetros de contaminación llumínica o que tien abondos díes al añu nos que pueda vese'l cielu estrelláu. Una y bona se llogre'l sellu de calidá, el rexidor allandés apunta que'l proyectu dirá tresformándose en daqué “más bultable” ya inclusive avanza que puede plantegase crear zones d'observación “con dalguna instalación pa poder esaminar les estrelles”.