¿Cuántu val una mina?: asina valoró los sos bienes la hestórica Vasco Leonesa na lliquidación

La hestoria de la Hullera Vasco Leonesa remonta al añu 1893. Fundose en Bilbao, con un capital de 1.300.000 pesetes. En 1942, la empresa comprola Emilio del Valle. De magar entós, empezó a crecer. La mayor parte de la so actividá asitió na montaña central lleonesa. Yera tala la producción, qu'al calor del carbón nacieron localidaes como Ciñera y Santa Lucía de Gordón. Na primera vivíen, mayoritariamente, los trabayadores. Na segunda, inxenieros y directivos. 

La hestoria de la Hullera Vasco Leonesa remonta al añu 1893. Fundose en Bilbao, con un capital de 1.300.000 pesetes

Nos sos años de rellumanza, usó tolos recursos posibles p'asitiar población y caltener a los trabayadores. Casi tolo qu'había na contorna, llevaba l'apellíu Del Valle: una empresa de tresporte urbanu, un equipu de fútbol, colexos, institutos, un centru de Formación Profesional... Según fontes sindicales de la dómina, “los Del Valle (la familia propietaria de la empresa) fixeron tolo posible por qu'una empresa automovilística nun asitiara na zona. Nun queríen perder mano d'obra”. 

Esa mano d'obra tan apreciada empezó a sobrar llueu. La crisis de la minería pasó factura rápido a la Hullera Vasco Leonesa. Nos años noventa, tenía trés grupos n'activo: Santa Lucía, Competidora y Tabliza. Quedó solo en funcionamientu'l terceru, colos pozos Aurelio del Valle y Emilio del Valle. La plantiya empezó a amenorgar con prexubilaciones y les contrates empecipiaron ERTEs ya impagos. En 2012, la situación yera insostenible y la contorna protagonizó la mayor movilización de la so hestoria. Sirvió de pocu. La histórica empresa minera, la más antigua d'España, anunció'l concursu d'acreedores –figura enantes conocida como suspensión de pagos–.

L'inventariu

Los alministradores concursales nun dieron esperanza, llueu empezó la lliquidación de los bienes. Y ende llegó la publicación del inventariu. Del total de 122 millones d'euros, ye'l capítulu de la esplotación a cielu abiertu la qu'apurre una mayor cuantía: un total de 31 millones d'euros. D'esti total, 28 millones correspuenden cola esplotación. Tenía casi dos millones d'euros en reserves. 

A los deldores axudicóse-yos, nel momentu de la lliquidación, 29 millones d'euros. Más de 17 millones correspuenden a la recuperación de pleitos. La esplotación interior taba valorada en casi ocho millones, de los que cinco yá correspondíen a bienes d'equipu. El llavaderu de carbón algamaba'l valor de seis millones d'euros y tenía más de cinco millones d'euros participaos n'otres empreses. 

Les concesiones tamién teníen una cuantía bultable: venticuatro millones d'euros y otros once en construcciones que se reparten, mayoritariamente, pola contorna de la montaña central lleonesa. Los inmuebles qu'atoparon comprador axudicáronse nun valor muncho más baxu del que taba afitáu nel procedimientu, principalmente pola escasa demanda. Lo mesmo que los sos terrenes y finques, con un valor sobre'l papel de casi trés millones d'euros. 

Ente la documentación de la lliquidación de la Vasco, choca especialmente l'apartáu de “otros bienes”. Solo n'obres d'arte, la Hullera Vasco Leonesa tenía 211.410 euros. L'inventariu inclúi obres d'Alfonso d'Olivares, Juan Navarro Baldeweg, Pablo Pazuelo y Ángeles Marco, ente otros. La empresa tamién punxo a la vienta los sos equipos informáticos, con ordenadores valoraos nun máximu de 400 euros. 

Una cayida estrueldosa pa la compañía, qu'entá sigui xenerando titulares. El postreru, a principios d'esti añu: ye una de les empreses d'España más empeñaes con facienda. En concretu, na llista de morosos ocupa'l puestu trenta y debe más de 34 millones. Inda güei, sigui debiendo pagues extra y lliquidaciones a una parte de la so plantiya –principalmente, la integrada por trabayadores de contrates–. 

Un accidente tráxicu

De toles deldes que-y queden a la Vasco, una ye imposible de saldar. La empresa va dir a xuiciu'l próximu mes d'abril, si la situación sanitaria lo permite, pol que foi l'accidente más grave de la minería nes últimes décades. Asocedió'l 13 d'ochobre de 2013, y morrieron seis trabayadores: José Luis Arias (de La Pola L.lena), Carlos Pérez, Manuel Moure, Antonio Blanco, Roberto Álvarez y Orlando González. La Hullera Vasco Leonesa redactó un informe, solo trés meses depués del sucesu, nel qu'aseguraba que lo asocedío produxérase pola emisión d'esmenu de metanu procedente de la cámara de surtiraxe o postaller”. Esto causó un desprendimientu instantáneu” de grisú, “imprevisible na so magnitú y consecuencies”. 

Una versión distinta al escritu d'acusación de la Fiscalía de Llión, qu'imputó a quince persones. Según el Ministeriu Fiscal, “tolos acusaos incumplieron la obligación que, polos sos respectivos cargos, llegalmente-yos incumbía”. La de facilitar “les midíes necesaries pa protexer la seguridá de los trabayadores”. Entá más atayante: sorrayó que “l'accidente yera previsible y evitable”.