Jesús Vega Ferrero, astrofísicu asturianu del CSIC, ye autor del mayor catálogu de clasificación morfolóxica de galaxes que se produxo hasta la fecha: 27 millones. L'anterior constaba de 600.000 y fízolu precisamente la so muyer, l'astrofísica Helena Domínguez, que tamién participó na nueva clasificación. La clave d'esti últimu trabayu ta nun algoritmu d'intelixencia artificial. Ello ye, nun fizo falta que Jesús Vega y el so equipu vieren una a una les 27 millones de galaxes, sinón que lo fixo por ellos una rede neuronal convolucional entrenada pa estremar ente galaxes espirales y elíptiques. 

“Catalogar a güeyu 27 millones ye imposible. Asina que preguntámonos: ¿O inventamos un métodu pa que la máquina les vea o eternizamos con observaciones?”, cuenta Jesús Vega, que pertenez al Institutu de Física de Cantabria (IFCA-CSIC), anque vive en Barcelona. Y llanzáronse a buscar esi métodu partiendo de les imaxes yá catalogaes a güeyu de 20.000 galaxes. “Toes elles yeren galaxes que taben mui cerca y yeren lluminoses. Ya interesábanos tamién clasificar les más débiles. Pa ello, utilizamos un trucu: asemeyar qu'en realidá taben más alloñaes”, detalla Jesús Vega, que pon como exemplu un faru nun barcu nel horizonte. 

“Cuanto más llueñe tea, más pequenu y menos lluz d'él va lleganos. Poro, lo que-y fiximos ye enseña-y imaxes a la máquina con galaxes cada vez más y más llueñe pa qu'aprendiere a identificales y a clasificales”, afonda. L'algoritmu d'aprendizaxe automáticu desenvueltu foi quien a atinar la morfoloxía de les galaxes nel 97% de los casos. Amás, pudieron estremar galaxes con mil vegaes menos rellumu de les que se clasificaren enantes. Y por si fora poco, delles de les incluyíes nel trabayu alcuéntrense a distancies de 8.000 millones d'años lluz –más de la metá de la edá del Universu–, lo que va dexar estudiar cómo camudaron les galaxes dende entós. 

¿Y por qué una catalogación morfolóxica? Porque “ta bien rellacionada col tipu d'estrelles que componen les galaxes, los sos mecanismos de formación y los caminos evolutivos que siguen”. Principalmente, el catálogu de Jesús Vega clasifica les galaxes en dos tipos: espirales, como la Vía Láctea, que tienen un discu xiratoriu onde nacen nueves estrelles y, por tanto, son d'un color azuláu; y les elíptiques, que son les más masives del Universu pero les “más aburríes” dende'l puntu de vista de la imaxe, yá que son una especie de nubes con permunches estrelles vieyes nel so interior y d'un tonu acoloratáu. 

Pal estudiu, l'astrofísicu asturianu partió de los datos de la Esploración d'Enerxía Escura (Dark Energy Survey, DEAS), que catalogó aprosimao “un octavu del cielu”, identificando más de 300 millones de galaxes. “Nós estrememos morfológicamente el 10% d'elles”, precisa. Científicos d'otros grupos yá s'interesaron por esti entrenamientu especial de la rede neuronal –una tecnoloxía que n'astrofísica se lleva aplicando solo cinco años– qu'amenorga tiempos y esfuerzos pa clasificar, por casu, galaxes n'interacción. Pero la metodoloxía, resalta Jesús Vega, puede aplicase a munchos otros campos. Por exemplu, pa diagnosticar cáncer. “La máquina puede estremar ente una galaxa y otra, mesmo que podría facelo ente un pulmón con tumor y otru sanu”, asegura. 

Jesús Vega nació en Madrid, pero ye de padres llaniscos y la so relación con Asturies ye bien estrecha. Tres años de formación nel estranxeru volvió pa facer ciencia n'España de la mano del Institutu de Física de Cantabria.