"Nunca vi daqué como esto, ye realmente curioso", comenta un coreanu mientres contempla per primer vegada una tarrina d'arroz con lleche. Son, nel llinguaxe d'internet, les sos primeres impresiones. Y sigue. Prébalo y ríndese a los encantos d'esti postre. "Ye perfectu pa la mio llingua", resume. L'arroz con lleche convence a tolos participantes del vídeu de la canal Pandita Chande, un espaciu con más de 620.000 siguidores nel que trés mozos coreanos traten de conocer los vezos de los países llatinos. Anque'l vídeu se mangó nel añu 2020, foi agora cuando se viralizó al compartilu estos díes miles de persones en redes sociales.
La reacción de los coreanos al arroz con lleche llama bien d'ello l'atención. Primero, abluquen porque "ye duce". Tres les primeres cuyaraes esclamen "Oh, ye increíble". Y siguen dando la so opinión: "puedo sentir la suavidá de la lleche".
Mientres abren otra tarrina confiesen "nun puedes dexar de comelo". Anímense entós a echa-y canela. "Ye una comida totalmente distinta", glayen.
La testura d'esti postre asturianu ye lo que más-yos gusta a los coreanos. Na presentación del vídeu especifiquen que pa llograr esa consistencia faen falta hores de cocción. Preséntenlo como un postre español y declárense fans absolutos.
