El “Caballín de La Viña”, una de les pieces d'arte prehistórico más misterioses ente les atopaes n'Asturies, va inxertáse nes colecciones del Muséu Arqueolóxicu “nunos meses”. Asina lo aseguró esti día'l so codescubridor y actual custodiu, Antonio Juaneda, en teniendo una xunta cola conseyera de Cultura, Política Llingüística y Turismu, Berta Piñán, y col director xeneral de Cultura y Patrimoniu, Pablo León Gasalla. “Aprecié avenencia pela so parte, el ‘Caballín’ ta más cerca del Arqueolóxicu que nunca, como siempre foi'l mio deséu. Porque esta pieza nun ye de mio, yo nun soi'l so propietariu, solo'l so depositariu: ye patrimoniu de tolos asturianos”, señalaba, tres la xunta, Juaneda, en declaraciones a LA NUEVA ESPAÑA. 

Los especialistes n'arte parietal utilicen una palabra pa definir al “Caballín”: “escepcional”. Ye una cabeza de caballu tallada en güesu, datada nel Magdaleniense y con una antigüedá aprosimao d'unos 14.000 años. N'orixe, la pieza asitiaría nel estremu d'un propulsor, que s'usaba pa llanzar dardos. 

L'afayu del “Caballín” ocurrió nel día de Tolos Santos de 1978. Nesa xornada, Juaneda y un amigu fotógrafu, Luis González, fueron al abellugu de La Viña, cueva de Mazaneda na que cuatro díes enantes Juaneda detectara restos de pintures murales prehistóriques. 

Nesta segunda visita, González y Juaneda atoparon la pequena pieza, que resultó estropiada nuna de les sos cares, presumiblemente al ser pisada de forma accidental por González. Magar esi dañu, la pieza tenía a les clares un valor escepcional, lo qu'acabó separando a los dos amigos. 

“Yo quería donala al muséu, pero él negóse, dixo que yera de so, que l'atopara él, y que yera'l so talismán. Llevábalu siempre con él, en viaxes per tol mundu, y tamién cuando emigró a Estaos Xuníos”, rellata Juaneda, qu'asegura que frutu d'esa diferencia de criteriu respecto al “Caballín” la so amistá sufrió una fonda resquiebra. “Cuando llevó la pieza a Estaos Xuníos dila por perdida, pero nin asina-y perdí la pista”, sostien. 

L'actitú de Luis González al respective del afayu sería llegalmente reprochable anguaño, por culpa de que tanto la llei 16/1985, del Patrimoniu Históricu Español, como la llei 1/2002 de Patrimoniu Cultural d'Asturies obliguen a apurrir a les entidaes correspondientes de salvaguarda del patrimoniu les pieces con valor históricu-artísticu atopaes, yá “sían afayaos de resultes d'escavaciones, remociones de tierra y obres de cualesquier índole o azar”, según consta na llei estatal. Pero en 1978, el marcu normativu regulábase por una llei d'Escavaciones y Antigüedaes redactada en 1911, y apenes retocada con posterioridá, que dexaba munches llagunes na protección d'esti tipu de bienes.

El “Caballín de La Viña”. A. J.

Herencia

El destín del “Caballín de La Viña” xiró otra vuelta en 2009. Esi añu, Luis González finó víctima d'un cáncer, y pol so deséu espreso sos herederos apurrieron la pieza al so vieyu amigu y codescubridor de la pervalible talla. 

Juaneda asegura que, yá nesi momentu, empobinó a la Conseyería de Cultura p'alcordar la entrega de la pieza, pero nun atopó la complicidá necesaria. “Nun percibí interés, nunca se tomaron en serio l'alquisición de la pieza, magar que en 2003 yo yá echara voz a la mesma Conseyería del so valor”, sostien Juaneda. 

Mientres toos esos años, la pieza citábase dacuando en dellos artículos científicos y reproduxérase dalguna fotografía (una d'elles en septiembre de 2001 nes páxines de LA NUEVA ESPAÑA), pero pocos tuvieren la oportunidá de vela. Yá en 2011, el mesmu Juaneda enseñóla nun artículu de la revista “Asturies”, editada pola Fundación Belenos, que la llevó a la so portada. Pero nin asina pudo concretase l'ingresu de la pieza nel Muséu Arqueolóxicu. “Hubo dalgunos desencuentros”, sostién Juaneda. La fama de la pieza, sicasí, crecía, y dalgún coleccionista llegó a proponer a Juaneda la so alquisición. “Fixéronme propuestes, pero nunca tuvi abiertu a negociar”, insiste Juaneda. 

La situación, asegura'l custodiu del “Caballín”, dio un baltu cola actual Alministración. “Berta Piñán, Pablo León Gasalla y la directora del Arqueolóxicu, María Antonia Pedregal, demostráronme la so esmolición pol patrimoniu y la so voluntá por que'l ‘Caballín’ entre nel muséu, de xuru que ye namás cuestión de tiempu”, señala Juaneda. La entrega, avanza, va facese “nunos meses”, namás concluya un estudiu detalláu del “Caballín”, pal qu'asegura tener el sofitu de la Conseyería. “El mio deséu siempre foi qu'el ‘Caballín’ acabara nel Muséu Arqueolóxicu, y esta pieza nun va salir d'Asturies de nenguna manera mientres yo viva, conclúi Juaneda.