“Anguaño tenía qu'esistir una solución pa los animalistes y pa los ganaderos”, sentencia Carlos Tornadijo, inxenieru informáticu orixinariu de Cangas. Esti asturianu diz que dio con una fórmula pa evitar los ataques d'animales selvaxes al ganáu y, al tiempu, nun esponer a estos animales a posibles consecuencies polos sos vezos contra los reses.
Tornadijo diseñó un dispositivu que, suxetu al pescuezu de vaques o xatos, puede sollertar al ganaderu de la presencia de depredadores y, de camín, escaznalos. “L'aparatu actívase por aciu de l'alteración del ritmu cardiacu de la vaca y emite una lluz y unos soníos que faen que los llobos o cualesquier animal selvaxe s'alloñe”, esplica l'inxenieru cangués. Y esos mesmos soníos nun afecten al ganáu pos, como esplica l'asturianu, “probóse que la mayor parte d'estos animales tán avezaos a ruios fuertes”.
La iniciativa surde cuando Tornadijo, qu'a los sos 44 años tien alternao'l so trabayu nuna empresa “startup” d'Uviéu y los sos estudios a distancia d'Inxeniería Informática, tuvo que realizar un trabayu de fin de grau (TFG) pa terminar la carrera.
Conocedor de la constante problemática de los animales selvaxes n'Asturies, y n'especial nel so conceyu natal, decidió llevar el so TFG más allá. Como tou proyectu, tien detrás una “gran base documental” y nun quier “dexar a naide atras”.
Por esa razón, el dispositivu nun va usar internet nin la rede habitual, sinón que funciona al traviés d'una rede de baxu consumu, comúnmente conocida como “l'internet de les coses” (LoRa). “N'Asturies hai munchos pueblos nos que nun hai nin cobertoria nin internet”, esplica l'asturianu. “Por eso esti dispositivu va usar esta rede que, ensin necesidá d'una fuerte conexón, va unviar los avisos a un router que puede tar en casa del ganaderu o, si l'Alministración s'interesase, va poder tener un sitiu cerca d'una torre eléctrica p'avisar a más ganaderos cercanos”, amiesta.
El dispositivu recueye tamién cuestiones que yá taben disponibles pa los ganaderos. “Dende la so propia casa, el dueñu puede encuriosar los parámetros de los aparatos y comprobar l'allugamientu del animal en tiempu real al traviés d'una páxina web que va implícita nel proyectu”, comenta Carlos Tornadijo. “Tamién ta pensáu'l fechu de que dellos animales pueden ser más sensibles qu'otros y una vaca podría nun tar sufriendo un ataque, pero, al tar nerviosa por dalguna razón, fadría saltar el dispositivu. Pa eso funcionen los parámetros, por que'l ganaderu pueda camudalo al so gustu”, añede.
“Ye una idea económica, porque con que dos o tres de les vaques lleven el dispositivu, el so radar ye grande abondo como p'avisar a otru aparatu d'un ganaderu cercanu”, señala. Asina, podría sollertase d'un peligru d'una finca a otra primero “de llamentar cualquier desgracia”.
El proyectu ta agora somorguiáu en fase de prebes. Los vecinos de Vil.larmental, en Cangas, fueron los candidatos pa ello y Carlos Tornadijo amuésase “peragradecíu” pola so collaboración. “Ye ún de los pueblos con males conexones, tanto per carretera como per rede, asina axuntaba tolos inconvenientes colos que'l dispositivu tien que bregar”, esplica.
Anguaño, a Tornadijo espéra-y un procesu de preba “llargu”. “Son les prebes pa escaznar a los animales. Sabemos que funciona a la perfección l'allugamientu y el sistema d'avisu, pero entá queden prebes pa comprobar que, amás de sollertar al ganaderu, tamién va evitar d'un xeitu amañosu l'ataque de llobos o otros animales escaznándolos”, sentencia.
Tornadijo cuenta con enseñar el dispositivu a les empreses coles mires de comercializalu. “La tecnoloxía puede terminar con esta problemática”, proclama optimista'l cangués, dispuestu a solucionar un vieyu conflictu de l'Asturies rural.
