El médicu llavianés Lisardo Lombardía, qu'acaba de xubilase como director xeneral del Festival Intercélticu de Lorient, recibió una reconocencia de la República Francesa que namás merecieron hasta la fecha grandes personalidaes de la cultura como Jorge Semprún, la galerista Juana de Aizpuru, el cineasta Pedro Almodóvar, l'actriz Carmen Maura o la cantante Luz Casal. Lombardía, qu'enantes de treslladase a Lorient dirixió'l Club Prensa Asturiana de LA NUEVA ESPAÑA, foi nomáu'l vienres Caballeru de la Orde de les Artes y les Lletres de la República Francesa. Recibió la condecoración de manes del ministru d'Asuntos Esteriores, Yves Le Drian, ex alcalde de Lorient, que pidió espresamente apurri-yla en persona. 

La condecoración otórgase por decretu y ta dirixida a “compensar a les persones que se distinguieron poles sos creaciones nos dominios de la cultura y la comunicación o pola so contribución al desenvolvimientu y espardimientu de les Artes y les Lletres en Francia y nel mundu”. La ceremonia tuvo llugar nel Salón d'Honor del Conceyu de Lorient. Nella, Lisardo Lombardía (Llaviana, 1955) fixo un percorríu pola so llarga vinculación con Francia y, cuantimás, con Bretaña, au aportó per primer vegada en 1977 pa facer práctiques de psiquiatría, disciplina que daquella-y interesaba especialmente nos sos estudios de Medicina. Tamién contó que siempres trató de facer del festival de Lorient una cita cultural moderna y abierta a la creación contemporánea, “non zarrada o d'idees nacionalistes, si non tolo contrario”. Lombardía, que se define como “un europeísta convencíu”, apreció que nel Festival de Lorient “taba construyéndose la Europa cultural de los pueblos ‘avant la lettre”. 

Del espíritu de Lorient, Lombardía aprecia la combinación de “respetu polo propio y sentíu d'apertura”. Confiésase un republicanu que, al clásicu “llibertá, igualdá, fraternidá” él axunta tamién la “diversidá”. 

Lombardía, que'l sábadu pasáu-y tuviera prestao tar n'Uviéu pa participar na manifestación pola oficialidá del asturianu, ta faciendo les maletes pa tornar a instalase na capital asturiana, onde volverá utilizar los sos antiguos locales de la discográfica “Fonoastur”, onde piensa sentase a escribir sobre los sos “vagabundeos culturales”. “La verdá ye que tengo ganes de volver a casa, echo de menos el país. Tengo unes ganes lloques de tomar una sidra, la nuesa, non la que faen en Bretaña”. 

Lombardía dexa'l so trabayu en Lorient col relevu fechu y el prestu de recibir gratitud polos servicios fechos. “Diéronme tantes medalles qu'igual caigo al ríu y nun salgo”, bromia.