Llámase Queen. Tien 38 años. Y unos güeyos verdes que s'espresen por ella cuando la emoció-y torga falar. Salvu'l nome, que recuerda a la Corona británica, Queen nun tien nada que ver cola reina Isabel II nin col palaciu de Buckingham. Pero fixo de la so casa una fortaleza. Queen Aduma nació en Nixeria. Fai yá dellos años viaxó a Avilés, onde formó'l so llar y tuvo a la so familia. Tenía tamién un negociu, un llocutoriu nel Carbayedo. “Un día'l mio home abandonó'l llar, dexónos ensin nada”, cuenta. Queen quedó ensin un horizonte y tres fíos que criar, los tres bien pequeños, tanto, que la pequeña, qu'agora tien diez años, colgaba del so pechu cuando pidió auxiliu. Primero pasó selmanes viviendo nel so llugar de trabayu: “Ellí nos duchábemos, comíemos… Dábame apuru pidir”, confiesa.
El destín llevóla al albergue pa persones ensin llar d'Avilés, na cai La Estación. Diéron-y l'habitación familiar. Y nel albergue pasó unos dos años. D'una vida normalizada a compartir platu colos usuarios del centru, munchos con vides desfilvanaes. Escolarizó a los sos fíos y púnxose a estudiar. Entrín y non hubo munchos cumpleaños nel albergue de transeúntes, munches navidaes so esi techu que ye de tolos que nun lu tienen…
Un día apurriéron-y un manizu de llaves: les de la so casa. Detrás d'esi llaveru taba Vipasa (Viviendes del Principáu d'Asturies) y munches manes de trabayadores sociales que s'axuntaron pa da-y ayuda. Esti día, Queen Aduma abrazaba a Cruz Fernández, responsable del albergue de persones ensin llar, a Andrea García, Marisa González… Porque la madre coraxe tornó al centru nel qu'un día llogró qu'abocanara'l Nuberu qu'anubría la so vida. Agora Queen vive en La Carriona, onde ta la so fortaleza, y trabaya como cocinera na “escuelina” de La Toba, en Llaranes. Los sos fíos son güei unos mozos que miren a un futuru con optimismu gracies a la so valentía: el mayor, agora con 19 años, estudia derechu. El medianu cumplió 15 y la pequeña, de diez, suaña con ser médicu o atleta.
“Una nunca escaez d'aú vien”, dicía Queen, sofitada polos que fueron la so familia y tamién pola alcaldesa d'Avilés, Mariví Monteserín; el director xeneral de Vivienda, Fermín Bravo; y Melania Álvarez, conseyera de Derechos Sociales. A toos ellos la madre coraxe agradeció-yos la so ayuda nel Día del desaniciu de la probeza. Pero'l trunfu ye so: “Con corazón puede consiguise tou”, diz la muyer, que nun puede evitar emocionase. A lo que la so fía pequeña, agora una moza que peña trences, abrázala pel costazu y bésala.
Melania Álvarez calificó la hestoria de Queen Aduma de “exemplar”: “Hestories como esta son les que ponen de manifiestu'l valor de lo público cuando, coordinadamente coles entidaes del tercer sector, ye posible combatir la probeza y que persones que s'atopen en situación de dificultá puedan empobinar el so proyectu vital”. La Conseyera aprovechó esti emotivu alcuentru n'Avilés p'avanzar la so intención d'inaugurar primero que termine esti 2021 cinco viviendes más en Xixón del proyectu “Housing First” (la casa primero), que s'estrenó de forma pionera n'Avilés en 2016 en collaboración col Gobiernu asturianu. “Con estes cinco yá van ser más de cuarenta d'estes viviendes n'Asturies que faen visible'l compromisu del Gobiernu d'Asturies pol desaniciu de la probeza más allá de los grandes númberos”, dixo. Valoró de la mesma que n'Avilés esistan anguaño “más de seiscientes viviendes d'arriendu accesible”.
Monteserín destacó que “lo primero pa combatir la probeza ye tener una vivienda”. “Esto'l Conceyu d'Avilés tiénlo bien claro, por eso somos ún de los conceyos que más invierti por que les persones tengan resueltu l'accesu a la vivienda. Cuéstanos munchu dineru, pero tamos perarguyosos d'esti esfuerzu”, concluyó l'Alcaldesa énte una Aduma emocionada.
Porque les reines tamién lloren, anque Queen esti día facíalo d'emoción: “Agora soi muy feliz. Tengo trabayu, los mios fíos estudios. ¿Qué más puedo pidir?”. La madre coraxe d'Avilés vuelve sonrir.
