El pasáu, el presente y, sobremanera, el futuru de la moda masculina asturiana resúmese nos cinco minutos del trabayu audiovisual “Agora”. Diríxelu l'estilista y director artísticu coañés Manuel Ángel Méndez, Manu Mendi, con dellos oxetivos y el convencimientu de qu'Asturies tien muncho que dicir nel mundu de la creación testil.
“La moda asturiana ta poco reconocida porque nun se viende como una marca, tenemos de danos a conocer con arguyu porque tenemos muncho artista y xente bien bono que ta trabayando perbién”, señala Mendi, quien concibió “Agora” en plenu confinamientu. “Aproveché la pandemia pa investigar sobre la moda española y ende afayé qu'hai munchos asturianos mozos espuntando a nivel nacional ya internacional. Una vegada afondé nos sos trabayos cai na cuenta de que toos en dalgún momentu, yá sía nuna de les sos colecciones o nun diseñu en concretu, tuvieron inspiración asturiana y d'ehí naz esti proyectu”, espón esti profesional, que xusto enantes del covid decidió dar un xiru a la so vida y dexar un puestu nuna conocida firma de moda p'apostar pol so proyectu personal. Trabayó en Londres y tamién en China y tornó a casa poco primero del confinamientu, qu'aprovechó pa investigar y facer contactos n'España.
Marcos Luengo, Carlota Barrera, Arturo Obegero, Celia B, Alfonso Pérez, Paula Currás (responsable de la firma Corsicana), Héctor Jareño (al mandu de Reliquiae) y Laura Martínez (cara visible de Peseta) conformen l'elencu de diseñadores presentes en “Agora” xunto a la firma L’Alfayate, que s'ocupó de los traxes tradicionales, complementaos con madreñes d'Artesanía d'Asturies. Ente les prendes más llamatives ta la capota d'Alfonso Pérez inspirada nel mantón de La Santina, los pantalones de gaiteru reconvertíos en prenda casual que robla Obegero o un top que recuerda les nases de pesca y que diseñó Carlota Barrera. “La idea ye entemecer prendes d'enantes, folclóriques principalmente, con prendes de diseñadores actuales d'Asturies, cola idea d'amosar que'l pasáu y el presente pueden convivir y, de la mesma, crear una nueva forma de llevar eses prendes”, apunta Mendi, quien sorraya que munchos de los diseñadores escoyíos producen colecciones que tienen, mayoritariamente, un calter unisex.
“Agora”, producíu en collaboración con Vértigo Estudio, cuenta una doble hestoria: na ficción fala d'una familia tradicional del occidente asturianu y, na realidá, busca amosar con tol rellumu posible la cultura y patrimoniu de la “tierrina” al traviés d'imaxes rodaes íntegramente na comarca occidental, dende'l puertu de Tapia al castru de Coaña.
“Con Agora quiero contar munches coses, pero, sobremanera, qu'Asturies ye un tou, ye moda, ye tradición, ye naturaleza”, señala'l coañés, satisfechu cola bona acoyida que ta teniendo la so propuesta. “Impactó bien dello porque naide esperaba esi amiestu”, añede, mui contentu tamién cola “collaboración total” de los diseñadores que s'axuntaron, ensin duldar, a la so innovadora propuesta.
