¿… Y si tolos emigrantes aquellos nun llegaren a marchar? Esto ye un xuegu. Un exerciciu, una somostriella con enseñanza, una ucronía estadística que tienta de recrear lo que sería de la historia si'l so cursu s'esviara nun puntu determináu. La entruga ye cómo sería Asturies güei si los mozos del sieglu XIX y principios del XX que marcharon p'América buscando fortuna quedaren equí… La hipótesis planteola, desenvolvióla y respondióla Jesús Arango, doctor n'Economía y profesor xubiláu de la Universidá d'Uviéu: a lo menos, los descendientes actuales de los expatriaos ente 1830 y 1930 daríen pa enllenar otra Asturies de más d'un millón d'habitantes; como muncho, nos escenarios con más potencia reproductiva, l'añadíu podría aportar hasta cerca de cinco millones y mediu.

Na so publicación de más recién, una minuciosa radiografía de la rexón que llamó “Reseña demográfica de Asturias”, el exconseyeru d'Agricultura del Principáu entra col bisturín nes desigualdaes territoriales, na semeya evolutiva hestórica y la complexa realidá actual de la población asturiana y desagua nesta somostriella que quier cuantificar los efectos que la gran emigración ultramarina de los asturianos del sieglu XIX y los primeros alboreceres del XX pudo tener sobre'l censu asturianu posterior.

Garrando como base'l trabayu del economista Rafael Anes sobre “La emigración de asturianos a América”, y calculando el númberu de descendientes añeraos en dellos escenarios según el númberu mediu de críos por xeneración, a Arango sálen-y 1.026.410 “fíos” d'aquella diáspora na estimación más conservadora –la cifra de población más actualizada da 1.013.018 en 2021–, hasta 5.411.772 na hipótesis más granible. Esti exerciciu va concluyir averando a eses cifres l'abondosa descendencia qu'aquel descomanáu éxodu d'asturianos foi espolvorexando pel mundu, pero sirve tamién, o igual sobremanera, pa imaxinar qué sería d'esta rexón si aquella gran marea d'emigrantes azotaos pola fame nun fuera lo que foi. El puntu de partida calcula, con base nel estudiu d'Anes, que nos cien años que van de 1830 a 1930 marcharon de la rexón 396.641 persones, un númberu prácticamente equivalente a la medría qu'esperimentó la población interior nel mesmu periodu, cifráu en 399.918 habitantes de 1833 a 1930. A partir d'ende, según los cálculos del economista, el millón d'asturianos residentes na Asturies de güei tendría un espeyu n'otru millón llargu ehí afuera namás con que cada xeneración d'indianos tuviera de media dos fíos por pareya, con un trenta por cientu de solteros y xuntures ensin descendencia. Ye l'escenariu numbéricu más conservador. Los demás alcen notablemente la cuenta. El volume de la proxenie actual de los indianos asturianos xubiría a millón y mediu si los dos fíos de promediu se corrixen con un venti por cientu de pareyes ensin herederos directos y a daqué más de tres millones y mediu si'l promediu fora de tres fíos y el porcentaxe de solteros o xuntures ensin críos, del trenta por cientu. Na hipótesis más espansiva, la magnitú del heriedu llegaría a rondar los cinco millones y mediu cola media en tres neños por matrimoniu y el promediu de xuntures ensin críos nel venti por cientu. 

Ye la grana multiplicada d'aquella eclosión indiana y daría asina, cuando menos, pa otra Asturies más grande que l'actual. Y eso qu'equí solo se cuenten cien años d'emigración ultramarina, pero hubo munchos más… L'exerciciu de cálculu hipotéticu sirve pa rescamplar la potencia expulsora d'una rexón qu'agora se duel del so censu menguante y avieyao que naquel tiempu “echaba xente fora”, axunta l'autor, porque nun podía alimentala. La emigración a ultramar, espón Arango na so publicación, foi dende los empiezos del sieglu XIX “una de les principales espiches que tuvieron les zones rurales d'Asturies pa combatir la probeza”, pa “encarar los escesos de población que nun podía caltener una agricultura basada nun gran númberu d'esplotaciones de tamañu piquiñín y que nun yeren quien a alimentar a les families llabradores”. 

Aquella Asturies distinta, que tenía 434.635 habitantes en 1833, na qu'inda la población d'Uviéu y Xixón superaba por bien poco a la de Valdés, Cangas del Narcea o Tinéu, siguió creciendo mientres espulsaba mases descomanaes de persones al otru llau del océanu. Queda dicho que los estudios cifren en casi 400.000 el recuentu de los que marcharon nun sieglu de puxu migratoriu nel que'l censu progresó nuna cifra asemeyada. Estos cálculos dicen que la so descendencia, xeneración tres xeneración, podría llegar hasta'l presente a lo menos triplicada. Habría munchos más “asturianos d'allá” que “asturianos d'acá”, munchos más sía que non que los apenes 136.000 que tán inscritos nel padrón oficial d'asturianos residentes nel estranxeru.