José Ramón Vidal trabayaba ente aceru de día y estudiaba les estrelles de nueche. Agora, yá xubiláu d'Ensidesa, dedica'l so tiempu llibre a estudiar l'universu. 

Él ye ún de los miembros de l'Asociación Astronómica Omega, con sede nel observatoriu de Deva (Xixón). Una entidá na que la pasión pola astronomía axunta a profesionales de tolos sectores imaxinables –dende mineros hasta astrofísicos–. Coordinaos pol Institutu Universitariu de Ciencies y Tecnoloxíes Espaciales d'Asturies (ICTEA), de la Universidá d'Uviéu, acaben de facer historia: doce socios de la entidá, la mayoría amateurs, participaron nun proyectu de divulgación que terminó d'un xeitu inesperáu. Afayaron cuatro exoplanetes (nomaos K2-355b, K2-356b, K2-357b y K2-358), y catorce nuevos candidatos. L'afayu, amás de l'atípica metodoloxía d'investigación, foi publicáu nuna revista de referencia internacional (“Monthly Notices of the Royal Atronomical Society”). 

Primero de too, un matiz. Afirma'l presidente del ICTEA, Javier de Cos, que “la importancia del afayu afítase non solo nel descubrimientu d'exoplanetes, sinón tamién nel entamu d'un proyectu de collaboración ente profesionales y amateurs”. Pasó mientres los meses de confinamientu pola crisis del covid-19. Investigadores del ICTEA, como Enrique Díez –tamién sociu d'Omega–, formaron y coordinaron a voluntarios aficionaos de la entidá pal estudiu de les “curves de lluz” de la decimoctava campaña del telescopiu espacial Képler, na so misión estendida K2. 

Y esto rique d'una esplicación pa non aniciaos, qu'ufierta l'astrofísicu Enrique Díez. Dende'l principiu: un exoplaneta ye un planeta acullá del nuesu sistema solar qu'orbita una estrella. El telescopiu Képler toma, cada trenta minutos, la midida del rellumu de 20.000 estrelles. Faelo mientres ochenta díes. Con estos datos rexístrense "curves de lluz” de cada estrella. 

Los miembros d'Omega, poro, observaron con procuru 20.000 “curves de lluz”. “Foi permunchu trabayu. Diba ser imposible dicir un númberu esactu d'hores dedicáu, fueron cientos d'hores”, apunta Díez. Les “curves de lluz” rexistren el rellumu qu'emite cada estrella cada media hora. Pa detectar los exoplanetes, añade l'astrofísicu, tien de confirmase un descensu de lluz periódicu repitíu nel tiempu. Esto ye, el momentu del ciclu del exoplaneta nel que “anubre” el rellumu de la estrella. 

Con esta escrupulosa observación, que s'allargó meses, confirmóse'l descubrimientu de los cuatro exoplanetes. Tamién catorce candidatos: “Los candidatos son aquellos exoplanetes que, podríemos dicir, técnicamente nun tán tan validaos. Tienen un marxe d'erru más altu qu'el de los que sí tán confirmaos”. Tán más que confirmaos. Porque esta investigación truxo otra conclusión d'envergadura: el güeyu humanu sigue siendo “más finu” que les máquines. En palabres de Javier de Cos: “Lo que ye güei, magar tolos algoritmos intelixentes desenvueltos, tanto n'otres instituciones como nel ICTEA, nada supera la capacidá humana pa detectar los planetes. Nesti campu, como en tantos otros dientro de l'astrofísica, disponer d'astrónomos amateur cola formación afayadiza permite entamar proyectos más ambiciosos con ésitu”. 

Y ún d'esos astrónomos amateur ye José Ramón Vidal, el xubiláu de Ensidesa que mira a les estrelles. Afirma que lleva “más de cincuenta años” dedicándose a la observación. Pero esti proyectu, añade, “ye'l primeru nel qu'estudié ‘curves de lluz’. Resultónos bien apasionante”. Afita'l plural: “Trabayamos toos muncho, prestaríame qu'apaeciera'l nome de tolos que roblen l'artículu. Porque merecémoslo toos, nun soi protagonista de nada”. 

Pos equí van tar. Amás de los científicos del ICTEA y astrónomos amateur de la sociedá Omega, participaron nel proyectu investigadores del departamentu de Química y Física Analítica de la Universidá d'Uviéu ya investigadores de les universidaes de Tokio, Chalmers y del Centru d'Astrobioloxía. Los sos nomes, tal qu'apaecen nel descubrimientu que yá publicó la NASA son: A. Castro-González, Y. Díez Alonso, J. Menéndez Blanco, J. Livingston, J. P. de Leon, J. Lillo-Box, J. Korth, S. Fernández Menéndez, J. M. Recio, F. Izquierdo-Ruiz, A. Coya Lozano, F. García de la Cuesta, N. Gómez Hernández, J. R. Vidal Blanco, R. Hevia Díaz, R. Pardo Silva, S. Pérez Acevedo, J. Polancos Ruiz, P. Padilla Tijerín, D. Vázquez García, S. L. Suárez Gómez, F. García Riesgo, C. González Gutiérrez, L. Bonavera, J. González-Nuevo, C. Rodríguez Pereira, F. Sánchez Lasheras, M. L. Sánchez Rodríguez, R. Muñiz, J. D. Santos Rodríguez, F. J. de Cos Juez. Toos, amateurs y profesionales, “cazadores” de planetes.