El conceutu robótica tresporta la mente a películes distópiques del estilu "Blade Runner", o hasta Xapón, trubiecu de les tecnoloxíes futures. Sicasí, ye abondo con dar un paséu per La Corredoria p'atopar un espaciu onde los neños programen estes máquines. Nun ye ciencia ficción, trátase de Teknoteka, una academia asitiada nel barriu que la so finalidá ye formar a los mozos pa remanar tou tipu de dispositivos tecnolóxicos. "Son nativos dixitales. Lo meyor que se-yos pueden enseñar ye cómo tresformar esta ciencia. Ye una manera de nun tar supeditaos a ella como usuarios", esplica Rubén Aparicio, profesor y xerente del centru.
Ye xueves de tarde y tóca-yos impartir clase a los más pequeños de la formación. Toos son alumnos de colexos de la zona. Adientren nel aula a pasu llixeru cinco neños y una neña, Zoe, única representante femenina del grupu. Según afirmen Rubén y la so muyer Lorena Cola (tamién propietaria), nesta temática entá s'alcuentra una resquiebra de xéneru. "¿Qué vamos facer güei?", pregunten al empar los pequeños. Solo tienen una clase cada selmana y siempre atopen dalguna propuesta novedosa preparada sobre la mesa. Güei hai un Lego.
-¿Un Lego?
-Nun ye lo que paez, ye un robot que van programar-, esplica Aparicio.
Que nun engañen les edaes, qu'ellos miden en "y mediu", porque tienen dende cinco y mediu hasta siete y mediu, nunca la cifra completa, pero estos neños son quien a crear por aciu d'un ordenador, pieces y cables, un saltapraos al que-y regulen la velocidá de movimientu. Esta idea naz de la intención de dar una vuelta al sistema educativu pa facer de la programación daqué atractivo, cuantimás agora que'l Ministeriu d'Educación mira d'incluyila nel programa. Rubén ye profesor de primaria y espertu nesta materia, por eso se decidió a entamar faciendo d'esta materia daqué lúdico: "Ye mui necesario porque motívalos enforma. Un neñu nun suel pidite una división más difícil en clase de matemátiques, pero cola robótica siempre quieren dir más allá".
Esta teoría demuéstrase ella sola. Cuando los estudiantes terminen de construyir el so Lego interactivu, intenten discurrir la manera de que garre más velocidá o cómo pone-y unes ruedes pa sumar potencia. "Encántame facer esto", diz Daniel Blanco mientres llevanta la mano p'avisar de que remató la xera con ésitu. Y si hai dalgún fallu, los docentes intenten normalizalu: "Ye dalgo mui común nesta área, ye too ensayu y erru. Lo importante ye que vean d'aú vien el problema y apriendan a igualu".
A la fin, tal como afirma Aparicio, anque la xente nun se decate, el mundu xira alredor de los robots: "Hasta'l funcionamientu d'un ascensor ye robótica", un conceutu que captaron les axiloses mentes de los neños, qu'empiecen a cuestionase sobre'l mecanismu que mueve'l día a día. Escaleres mecániques, estaciones atmosfériques, personaxes de videoxuegos son coses poles qu'entruguen estos aprendices de programadores. Nun son los únicos, una y bones el centru tamién imparte clases pa rapazos de la ESO, que yá son verdaderos espertos nel ámbitu de la informática. "Esos van solos, utilicen impresión 3D y ellaboren proyectos complexos", diz el profesor.
A lo llargo d'una hora realicen la xera, "el tiempu perfectu pa que nun escose l'interés", sostien Colao. Al rematar esta xornada'l premiu consiste en preparar una carrera ente los seis saltapraos que dan vueltes pela sala. Mánguenlos en suelu con nerviosismu y ordenen al portátil que los ponga en marcha. ¡La diversión ta sirvida! Caún escorre al so androide al gritu de: "¡Ye'l míu! ¡Mirái'l míu!". Empiecen a reprogramarlos una y otra vez, pa repitir la tienra estampa qu'amuesa la inocencia y tenacidá infantil.
A lo último, queda la parte más complexa: recoyer y esperar a que pase la selmana p'abrir la misteriosa caxa qu'espera'l próximu xueves a estos mozos ases de la tecnoloxía.
