La obra “Fortuna”, del escritor Milio Rodríguez Cueto, collaborador de LA NUEVA ESPAÑA, foi la ganadora del primer “Premiu de Novela Curtia Andrés Solar Santurio”, impulsáu pola Fundación Municipal de Cultura de Xixón. Esti trabayu de novela curtia en llingua asturiana foi escoyíu pol xuráu ente los once orixinales presentaos al concursu, nel que Milio Rodríguez Cueto compitió col pseudónimu “Kosmas de Bizancio”.
“Fortuna” recrea nes sos páxines “paisaxes urbanos y periurbanos d'una Asturies real y cotidiana na que se reflexen esperiencies y emociones personales con un usu del llinguaxe bien natural y cuidáu”, según destacó'l xuráu d'esti galardón, que tamién rescampló “la calidá de les obres presentaes, qu'afaló un estensu alderique”, y recalcó sobre'l vencedor “la fondura psicolóxica de la so obra.
La entrega del premiu fíxose esti día nel Centru de Cultura Antiguu Institutu. Na mesma tuvo l'autor de “Fortuna”, y tamién Lali Solar, fía d'Andrés Solar, escritor xixonés que morrió fai casi cuatro décades nun accidente de coche.
Miguel Barrero, componente del xuráu xunto a los escritores Laura Marcos y Miguel Rojo, destacó la importancia d'esti nuevu reconocimientu. “Sacantes ‘Asturias joven’ nun hai más espaciu pa la novela curtia. Ye una amuesa de sofitu a la llingua asturiana y la so lliteratura, que vien teniendo un pesu importante”, dixo'l director de la Fundación Municipal de Cultura.
L'actu d'entrega celebróse coincidiendo col 37.º aniversariu de la muerte d'Andrés Solar, y nel mesmu tamién tuvo presente María Xosé Rodríguez, responsable de la Oficina de Normalización Llingüística de la Fundación de Cultura y secretaria del xuráu.
