El día nel que Miguel Martínez (Uviéu, 1985) dexó Asturies pa marchar a vivir a Londres díxo-y a sos padres que namás-y diba facer falta que-y pagaren trés meses d'arriendu na capital de Reinu Uníu –daquella na Unión Europea– y otros tantos de clases d'inglés. Diba ser daqué temporal. A cambéu, so padre ufiertó-y que cada cerveza que fuera quien a pidir n'inglés diba de la so cuenta. “Nun sabía lo que me dicía”, bromia l'uvieín. Gracies a eses cerveces fixo decenes de contactos colos que diben ser los sos socios del futuru. Trece años depués, Martínez –inxenieru técnicu y superior n'informática pola Universidá d'Uviéu y doctor n'informática pola Queen Mary University of London– ye'l cofundador d'una compañía d'intelixencia artificial, de nome Signal AI, que nos postreros trés años recaudó cien millones de dólares (más de 88 millones d'euros) en distintes rondes d'inversión, la última va solo unes selmanes y na qu'atropó cincuenta millones. Agora trabaya pa les grandes multinacionales del mundu. Asina define'l so trabayu: “Somos una compañía qu'usamos la intelixencia artificial por que les empreses puedan tomar meyores decisiones teniendo tola información”. 

La so compañía, que cofundó nuna cochera de la contorna de Londres en 2013, analiza en tiempu real más de cuatro millones de documentos diarios, incluyendo noticies, lexislación o blogues por que los sos veceros puedan entender cuándo y cómo los menten nos medios de comunicación. “D'esti xeitu les compañíes pueden tomar decisiones”, asegura. Pueden detectar oportunidaes y riesgos comerciales y reputacionales a nivel global. Y añede qu'entrenaron tanto al algoritmu que ye quien a identificar testos que, por casu, falen sobre'l “brexit” (la salida de Reinu Uníu de la Unión Europea) anque nin siquier incluyan esa palabra. Signal AI pasó de los trés trabayadores que tenía en 2014, cuando empezó a operar nuna pequeña cochera, a los doscientos que tien agora mesmo. Anque Martínez puntualiza qu'esos entamos pueden abultar mui románticos pel aire a “start up” (empresa emerxente) americana, matiza que “los garaxes en Londres son caros”. La empresa tien oficines, amás d'en Londres, en Nueva York y Hong Kong y tien en cartera a miles de veceros como Deloitte, Telefónica, AIG o HSBC. Recibió un ensame de premios y foi incluyida en numberoses ocasiones nel top 25 de compañíes del Reinu Uníu con mayor crecedera según el Times Tech Track 2020 ranking. Martínez tamién foi galardonáu col premiu “Bussines Leader of Tomorrow” (daqué asina como “líder de los negocios de la mañana”) pola axencia d'anovación del gobiernu británicu, la Innovate UK. 

L'uvieín nun pierde de vista los sos raigaños. Ta bien interesáu nel ecosistema de “start ups” (empreses emerxentes) asturianes pa participar como inversor en dalgunes d'elles o como ponte hacia otros “bussines angels” (inversores). Porque sostien qu'en Reinu Uníu hai muncho capital que ta naguando por atopar proyectos que seyan viables. 

El pasáu branu tuvo alcuentros con munches d'estes compañíes pa conocer la so realidá. La so conclusión ye que n'Asturies “hai muncho talentu, mui bones idees, pero falta capital. Munches idees carecen de falta d'ambición”. Tamién ye de los que cree que la rexón necesita d'una mayor unión y esplotar les distintes posibilidaes qu'ufierten Uviéu, Xixón y Avilés.