En cinco años, de 2017 a 2021, prindáronse en prisión un total de 197 teléfonos móviles, introducíos na cárcel de les maneres más pelegrines. Solo l'añu pasáu, atopáronse nel centru penitenciariu asturianu 55 d'estos aparatos prohibíos dientro de les prisiones, pa evitar la continuación del delitu, ente otros, de bandes organizaes o de violencia de xéneru. Esto conviértelos n'elementos bien cotizaos ente los presos, xenerando un mercáu negru colos problemes qu'esto xenera.
El sindicatu ACAIP-UXT rescampló'l trabayu que realicen los empleaos públicos penitenciarios pa evitar el comerciu ilícitu d'estos aparatos. En munchos casos, estos teléfonos son utilizaos pa siguir cola actividá delictiva y sustraese al control de les comunicaciones. L'usu d'estos teléfonos puede xenerar deudes ente los internos ya incidentes pol so control. Por ello, los trabayadores penitenciarios dediquen grandes esfuerzos nel decomisu d'estos oxetos, la mayoría de los cualos camúflense fácilmente pol so pequeñu tamañu y escapen a los detectores de metales al ser los sos componentes de plásticu.
Ello ye que s'afayen nos llugares más insospechados, como sueles de zapatos, botes de refrescu o en productos hixénicos. Los funcionarios atópenlos camuflaos en rabanaes de pan, na llingüeta de los playeros, inclusive "embutíu" nel rectu de dalgún reclusu qu'aporta de permisu.
La introducción d'oxetos prohibíos "perxudica gravemente'l funcionamientu normal d'un centru penitenciariu polo que faen falta los medios materiales y humanos abondo" pa evitar la so entrada y realizar el control nel interior. Pero tou esto rique, "del correctu funcionamientu de los inhibidores de les prisiones y que s'afayen a les nueves tecnoloxíes". Si se llenden les posibilidaes d'usu, amenórgase la utilidá y evítase'l comerciu ilícitu, sostienen los funcionarios de prisiones.
ACAIP-UXT insiste na necesidá d'ocupar toles vacantes. "Les nueves promociones apenes cubren les baxes vexetatives. Amás, hai qu'afayar el organigrama de los centros penitenciarios a les nueves formes de delincuencia, y redimensionar la relación de puestos de trabayu p'afayales a les nueves funciones. Por eso fai falta retomar la negociación de la Llei de Función Pública Penitenciaria pa encarar los nuevos retos a los que s'enfrenta la institución", indica'l sindicatu.
