Los estudios sobre los afayos nel xacimientu arqueolóxicu del Peñón de Raíces siguen revelando sorpreses. Los restos óseos humanos alcontraos na necrópolis venceyada a la ilesia de San Salvador en 2013 nun correspuenden a soldaos medievales, como primeramente abarruntaben los arqueólogos. Un estudiu recién realizáu na Universidá de Burgos pola antropóloga sotobarquense Rebeca García González permitió determinar que les dos osamentes desenterraes nel Castiellu de Gauzón fai casi una década correspuenden a dos muyeres, concretamente a una adulta d'entre 45 y 49 años finada a mediaos del sieglu XIII y a una moza d'ente 12 y 14. L'equipu arqueolóxicu que lideren Alejandro García ya Iván Muñiz cree que dambes pertenecen a una familia de la nobleza local que vivía nel castiellu como “encomendera” o usufructuaria de la encomienda de la Orde de Santiago. Si los enterramientos son coetaneos, si hai parentescu entre la muyer y la moza o la causa de los sos fallecimientos, desconozse. Siquier dica agora. Pa llegar a más conclusiones van facer falta nuevos exames, entre ellos estudios d'ADN.
La localización en 2013 de dos enterramientos nel xacimientu castrillonense (entre otros restos óseos inconexos y esvalixaos, frutu d'antiguos saqueos) supunxo la confirmación de que nel Gauzón taba la ilesia de San Salvador, consagrada en dómina d'Alfonso III (866-910), nel terciu norte de la plataforma cimera. Los arqueólogos alcontraron entós una inhumación nun cabuercu y qu'escarecía de les estremidaes inferiores. La cadarma alcontrábase en posición de decúbito supino, orientada este-oeste cola cabeza escontra l'oeste.
Según l'estudiu realizáu pola antropóloga Rebeca García correspuende a una moza d'entre 12 y 14 años con patoloxíes dentales, daqué mui común na dómina. Namás pudo concluyir la sotobarquense del estudiu d'esta cadarma, cuidao que “nun ta mui completu”.
Sí que s'alcontró completa la segunda cadarma, que tamién se soterró nuna fuexa, en posición decúbito supino y cola mesma orientación este-oeste. “Correspuende a una muyer adulta, d'entre 45 y 49 años y de 1,50 metros d'altor. Pudi determinar que presentaba patoloxíes dentales (caries, sarro) y que perdiera tola dentición posterior (les mueles) primero de morrer. La hixene bucodental yera bien probe naquella dómina. Sosprendiónos enforma afayar que tamos énte los restos de dos muyeres porque pensábemos que yeren soldaos”, esplica Rebeca García, que collabora dende va años con Alejandro García. En 2002 dambos concidieron nuna escavación de los resclavos del conventu dominicu de San Pablo nel antiguu solar de Caballería de Burgos, güei Muséu de la Evolución Humana. Ella ye profesora na Universidá de Burgos dende 2009 y bona parte de la so carrera investigadora ta amestada al xacimientu de Atapuerca.
Ilesia de San Salvador
L'afayu de los enterramientos del Peñón de Raíces y los estudios antropolóxicos posteriores permitieron confirmar que los arqueólogos afayaron naquel yá alloñáu 2013 el campusantu de la ilesia de San Salvador. “Había nicios pero non evidencies clares. Ye un templu mentáu yá en cróniques medievales como perimportante, consagráu en dómina d'Alfonso III y afatáu con preciosos mármoles. Alcontrámoslu a partir de los enterramientos na zona alta del castiellu, na plataforma cimera, pero nel espolón que mira escontra'l mar. Ehí creemos que taba la ilesia, una capiya palatina venceyada al palaciu y d'usu de los reis. Falamos de la dómina del Reinu d'Asturies, de los sieglos IX y X”, espón Alejandro García.
Les cadarmes apurrieron nueva información, non esperada a priori, y una cronoloxía. Per un llau, revelóse que correspuenden a dos muyeres y consiguióse determinar hasta cuando tuvo n'usu la ilesia.
“Mandamos a datar un diente de la muyer adulta y esa muyer finó entre 1220 y 1270, según el carbonu 14. Estos datos demuestren la pervivencia nel usu de la ilesia del castiellu a lo llargo de la última fase de la ocupación de la fortaleza, desque esta se-y entrega a la Orde de Santiago en 1222 hasta'l valtamientu del castiellu a mediaos del sieglu XIV”, añede García Álvarez-Busto.
La Orde de Santiago taba daquella enyerbada cola esmolición pola meyora de la Conquista n'Andalucía y solía entregar castiellos como'l de Gauzón a la nobleza de la zona, los encomenderos, que teníen l'usufructu de la fortaleza. Pa los nobles locales nun había mayor prestíu qu'habitar un castiellu. “Podemos deducir qu'estos miembros de la nobleza soterrábense nel campusantu del castiellu. Xusto nesa dómina del enterramientu de la muyer adulta, en 1222, apaez na documentación escrita la primer mención al conceyu, a l'Alfoz Castrelyon. Podemos dicir, ente comines, qu'eses cadarmes qu'atopamos son de los primeros vecinos de Castrillón. Creemos qu'eses muyeres son miembros d'esa familia de la pequeña nobleza local que moraba nel sieglu XIII nel Castiellu, non alta aristocracia como la que moraba en Gauzón nos sieglos IX y X”, sostien l'arqueólogu.
Solo una quinta parte escavada
Na zona onde fueron alcontraes les cadarmes de les dos muyeres yá atopara na década de 1970 Vicente José González García un enterramientu. “Aquel yera un enterramientu más distinguíu, con una tapa de piedra, d'aristocracia más alta. Aquellos restos fueron saquiaos, entós el Peñón de Raíces nun tenía la protección actual. Nesti otru casu ye un enterramientu nun cabuercu, senciellu. Pola tipoloxía y la forma de la fuexa, creemos que los enterramientos (de la muyer y de l'adolescente) son coetaneos, pero non podemos asegurálo enagora, ye bien malo de precisar”, añede.
La necrópolis y la ilesia de San Salvador taben asitiaes nel espolón norte de la plataforma cimera del xacimientu. Los arqueólogos escavaron desque empezaron les campañes nel Peñón de Raíces una quinta parte d'esa superficie. “Ye una zona que d'equí p'alantre sería mui interesante escavar n'estensión. Suponemos que va haber más resclavos arqueolóxicos de la ilesia y tamién más persones soterraes. Yá apaeció dalgún escarrapiu mui pequenu de mármol, posible decoración de la ilesia”, conclúi Alejandro García.
Arqueólogu y antropóloga confíen en poder siguir investigando pa consiguir determinar el parentescu y la causa de la muerte d'estes pobladores del Gauzón, sobremanera nel casu de la moza, a la qu'anubren entá más incógnites.
