“Llevo dos años cola empresa. El primeru foi mui floxu cola tema de la pandemia, pero l'añu pasáu foi terrible, tuvi muncha xente, nun yera pa con ello”, esplica José Manuel García, un mozu entamador rural de Cangas qu'un día decidió ponese al mandu d'un trabayu que nació, con toa probabilidá, d'una infancia percorriendo la Naturaleza de les manes de so padre.
“Yo crié viendo animales, tolos díes diba col mio padre al monte y siempre víemos animales. Yera y ye una esperiencia única si te gusta'l mediu natural y, entá más, si vives nél dende neñu”, esplica esti mozu que, nun primer momentu, formóse en cocina porque pertenez a una familia hostelera de la capital canguesa. “Formé pa daqué distinto dafechu a lo que faigo güei, pero bonu, yera normal, los mios padres queríen que siguiera nel negociu pero, a los 18 años, yo sabía que lo que quería facer yera dedicame a lo que por fin faigo güei”, esplica con convencimientu, esti mozu, al mandu de la so empresa Monte Activo, dedicada al turismu activu y na que l'avistamientu d'osos y otros animales ye una de les sos principales ufiertes.
“A los 18 años yá sabía que yera esto lo que quería facer pero nun m'atrevía a dar el pasu por mieu a tola tema del papeléu y tolo que traía entamalo. Yá empezara a facer distintos cursos de formación nestes actividaes y a la fin di'l pasu en xineru de 2020 con 21 años. Total, que me pilló la pandemia con tol papeléu llistu pa poneme a trabayar. Afectóme como a tol mundu, pero cuando finalmente pudo volvese a l'actividá, fíxelo con más fuerza que nunca entá sabiendo que yeren díes difíciles. Yo creo qu'hai qu'echa-y valor a les coses si quies llograr daqué na vida”, esplica esti entamador rural.
Del mesmu xeitu matiza que, dientro de les actividaes d'avistamientu, tamién ufierta “un pic-nic con productos kilómetro cero onde tolo qu'ufiertamos ye ensin gluten, una ufierta conxunta na que somos los primeros n'España en realizala”. Hai que recordar que Cangas cuenta con un importante númberu de persones celiaques, con una tasa perriba de la media del país.
José Manuel García, de 23 años, ye'l más mozu de los empresarios especializaos n'avistamientos de fauna y actividaes na naturaleza na so zona. “Yo nun voi a un sitiu fixu, al contrario, voi moviendo y vamos onde vemos l'osu. Lo principal ye que la xente disfrute viéndolu y, coles mesmes, que disfrute tamién de la nuesa gastronomía, que ye otra formar de fomentar a los nuesos productores”.
Otra de les actividaes que destaca ye llevar a los viaxeros a vivir un día realizando les actividaes habituales nuna aldea, nel campu y na quintana. “Pasar un día enteru nuna casa de llabranza, llevar el ganáu a les camperes, ver cómo se trabaya la yerba, sobremanera cuando llega'l branu, o cómo se fai pan, y participar nello. A lo último actividaes habituales nuna quintana como catar, recoyer lo güevos de les pites, a lo último, tou eso”, esplica.
García cree que puede entamase nel mediu rural. “Lo que tienes que facer ye intentalo y aneciar, apostar por ello y siguir alantre. Yo creo qu'hai futuru nel mundu rural, cada vez hai más xente volviendo o instalándose otra vuelta nos pueblos. Cuando yo yera pequenu pela selmana pel chigre de los mios padres pasaba poca xente y funcionaba en fin de selmana. Agora, sicasí, hai una demanda diaria y pel branu vien munchísima más. Esta zona ta viviendo un importante boom turísticu porque tenemos paisaxes, gastronomía y una ufierta d'ociu bien bona. Cada vez hai más turismu en Cangas y non yá nes dómines claves. Nesti sentíu creo que'l Parador de Corias foi y ye perimportante, dionos un emburrión mui grande a nivel turísticu”.
