“Dame la pata” ye'l nuevu modelu de voluntariáu que s'entamó nel albergue municipal d'animales de Llangréu. El programa ta xestionáu pola organización non gubernamental Maspaz. “El nuevu proyectu va tar estremáu en cinco árees d'actividaes distintes p'atender a les necesidaes específiques de cada animal y facilitar la so adaptación ambiental y social. D'esti xeitu, cuando sían adoptaos, la so integración na nueva familia va ser más rápida y completa”, indicó'l gobiernu local de Llangréu. 

Les actividaes consisten en “paseos holísticos qu'incorporen exercicios prestosos y afeutivos; acicaláu integral pa desarrollar un venceyu afeutivu ente l'humanu y l'animal; y actividaes con perros potencialmente peligrosos, con un paséu con caún d'ellos d'unos 15 o 20 minutos por que descargue la enerxía acumulada. Depués van realizase actividaes relaxantes, sobremanera olfatives”. Tamién se van desenvolver iniciatives de “rexeneración emocional, pa combatir los posibles problemes d'adaptación de los perros, y d'arriquecimientu ambiental. 

“Per primer vegada van ser voluntarios nel albergue los miembros del grupu de participación adolescente del Conceyu de Llangréu que dinamiza l'asociación Los Glayus”, concluyeron dende'l Consistoriu.