Lo primero qu'entrugen los turistes a los informadores ambientales de la Fundación Osu d'Asturies (FOA), con sede en Proaza, ye si hai osos y qué ye lo que tienen que facer si s'atopen con un exemplar nuna sienda. “Vemos qu'en munches ocasiones tienen una imaxe americanizada, piensen que son como un osu grizzly y qu'hai que facer ruiu y glayá-yos, dacuando porque-yos lo dixeron n'Estaos Xuníos. Pero nun ye asina porque tienen comportamientos distintos y los grizzly son muncho más amenazantes que l'osu pardu, qu'en cuanto siente falar a la xente, escapa”, esplica Lucía Cerra, informadora de FOA. 

Va cuatro años que la Fundación entamó esti recursu, que tien el patrociniu d'EDP y Grupo Baldajos, p'atender al creciente turismu de naturaleza n'Asturies. L'oxetivu ye informar a los visitantes sobre cómo evitar impactos negativos sobre la biodiversidá de los espacios pa llograr, entre otres coses, concienciar a los visitantes sobre la necesidá de nun dexar basura o nun fadiar a la fauna. Y yá atendieron a 11.000 persones y tienen repartío más de 10.000 folletos con información ambiental pa conocer, por casu, que los perros qu'hai sueltos nos pueblos y praos son guardianes y nun tán abandonaos. 

“Abúltame una iniciativa mui interesante porque'l que vien de fuera nun sabe y empobínente, amás como te llama too l'atención, puedes equivocate tamién”, diz José Ignacio de las Heras, turista de Valencia atendíu polos informadores. Son un total de cuatro, repartíos pel parque natural de Les Ubiñes-La Mesa (Teberga, Quirós y L.lena), Somiedu, o Proaza y Santo Adriano, onde tamién aconseyen sobre los recursos naturales disponibles y realicen encuestes pa evaluar el perfil de los visitantes y el so efectu sobre les economíes locales. Un cuestionariu que desarrolló'l doctor en Bioloxía Javier Naves, de la Estación Biolóxica de Doñana y miembru del conseyu científicu asesor de la FOA. 

“Munches vegaes vemos que nun saben nin si quiera qu'hai osos nel territoriu y tienden a pensar que ‘Paca’ y ‘Molina’ son los postreros que queden”, esplica Ignacio Jiménez en referencia a les oses de la corralada de Proaza y Santo Adriano que xestiona la Fundación. 

Per otru llau, los turistes que sí saben qu'hai osos n'Asturies pregunten ónde pueden velos y cómo. “Aconseyámos-yos que vaigan acompañaos d'una empresa especializada”, señala l'informador Nacho Cabildo. 

Tamién se da a conocer a los visitantes que non solo hai osos nel territoriu y que dando nun paséu per un fayéu, en silenciu, pueden vese venaos. “Munches vegaes pierden de disfrutar de la naturaleza por falta de conocimientu”, añede Cerra. Los informadores avisen coles mesmes de qu'hailos que lleguen y faenlo yá como “ecoturistes”, con una bona conocencia de cómo remanase na naturaleza ensin dexar güelga. 

“Agradezse”

“Abúltame súper interesante y estupendo, ye una información que s'agradez porque t'evita histories”, apunta Salvador Pacheco, de Valencia, n'atendiendo la encuesta xubíu inda a una bicicleta depués de facer la Sienda del Osu. Los visitantes, polo xeneral, déxense asesorar y participen na encuesta, cola qu'evalúen tamién aspeutos turísticos en relación al agospiamientu o cómo s'informaron pa conocer el territoriu. “Faen perbién el so trabayu y ye una información perútil pa movese pela zona”, detalla Carlos Alberto Pardo, visitante de Galicia. 

La iniciativa ye un ésitu y llueu va llegar tamién a los parques naturales de Fontes del Narcea, Degaña y Ibias y al de Redes, ente Casu y Sobrescobio. Tou por que los turistes conozan a xeitu'l territoriu rural asturianu, la so naturaleza, flora y fauna y por que naide confunda al osu pardu cantábricu con un exemplar de la especie grizzly.