Si tolos vecinos de Gozón ya Illas empareyaren ún a ún coles vaques que viven en dambos conceyos podría facese una semeya na que prácticamente cada persona tendría al llau una res, y entá quedaríen animales desapareyaos en territoriu gozoniegu. Porque en Gozón viven, según l'últimu datu censal, 10.412 habitantes y la cabaña bovina ye de 10.529 reses; n'Illas, 1.071 vecinos y 947 vaques. 

¿Qué indica esta interesada comparanza? A xuiciu de los alcaldes de dambos conceyos, Jorge Suárez (PSOE) en Gozón y Alberto Tirador (IX) n'Illas, que los sos territorios son espacios ganaderos con puxu y que, verdaderamente, la cifra de población va p'abaxo, como nel conxuntu del campu asturianu y español. En diciendo esto, Tirador matiza: “Pero que conste qu'Illas foi l'añu pasáu ún de los cuatro conceyos asturianos que ganó población”. Y Suárez acuta: “En Gozón ta frenándose la sangría demográfica y hai condiciones pa tornala”. Los rexidores son optimistes ensin dexar de ser realistes. 

Jorge Suárez, que sigue viviendo nel pueblu d'El Ferriru, onde nació y se crio, remembra aquellos años de la so infancia “nos qu'había vaques en toles cases del pueblu”. Imposible saber si tantes o más que vecinos, pero ello ye que “n'esplotaciones familiares infinitamente más pequenes que les actuales”. Anguaño “solo cuatro o cinco families siguen criando ganáu, pero tienen munches más reses que lo que se llevaba antaño”. Lo mesmo pasa n'Illas, onde les casi mil vaques censaes tán en manes d'apenes una docena de ganaderos, y d'ellos cuentense colos deos d'una mano los que viven espresamente d'esa actividá. 

El conceyal del PP, ganaderu y líder sindical agrariu –preside Asaja– Ramón Artime saca pechu pola cabaña bovina del so conceyu: “Hai ganaderos de primer nivel, munchos mozos y una apuesta clara pol futuru del sector. Ensin mieu a equivocame puede dicise que Gozón ye ún de los conceyos asturianos onde meyor se fixo la transición ganadera qu'impunxo la Unión Europea. Otra cosa ye saber cuántu vamos aguantar coles actuales polítiques comunitaries paniaguaes”. Por eso hai, se supon, tantes vaques. 

Alberto Tirador sostien que n'Illas va años “había'l doble de vaques que de paisanos, y eso habiendo munchos más paisanos qu'agora”. Esto ye que nun-y llama l'atención qu'anguaño les cifres tean igualaes. La so esmolición nun son tanto'l númberu de vaques, sinón el de persones. Illas tomó una deriva positiva en términos demográficos y lo que quier Alberto Tirador ye caltenela: “La nuesa estratexa como gobiernu municipal ye clara: Illas va ser lo qu'haya de ser pero la base económica y la exa de toles polítiques va ser el campu, que ye la nuesa esencia. A partir d'ende, lo que venga va ser bienveníu”. 

Lo que “vien”, pel momento, ye turismu que busca Naturaleza, paisaxe y gastronomía, dalguna qu'otra actividá económica non agresiva col mediu natural y munches persones interesaes en mercar vivienda por aquello de qu'el covid punxo de moda'l campu ya Illas gocia d'un allugamientu privilexáu nel centru d'Asturies, cerca de too y llueñe abonso de los focos de masificación poblacional. 

Tirador, un reputáu analista del despoblamientu rural, señala como primer dificultá p'atraer población la “falta de materia primo”. Y esplícase: “Nun nacen neños y los estranxeros que lleguen a España nun tienen Asturies como destín predilectu”. A esi respectu, poco pueden facer Illas o Asturies nel so conxuntu, “igual entamar polítiques xeneradores d'empléu”. 

Tirador, sicasí, sí cree que la comunidá autónoma podría “pensar más el campu”. ¿Cómo? “De mano, camudando'l modelu urbanita de planificación urbanística, esi qu'agora conderga al campu a ser un parque temáticu pa usu y disfrute ocasional de la xente de la ciudá. El diseñu d'Asturies tien de facese dende la escucha y el respetu a les persones del campu, que nun son la mayoría pero son los que pueblen la mayor parte del territoriu y los que caltienen esi paisaxe del que tanto presumimos”. 

Tantu o más optimista sobre'l resurdir de lo rural ye Sila Fernández, que xunto a la so familia caltien una tradición familiar agro-ganadera de seis xeneraciones na aldea gozoniega de Mazaneda. La ganadería de carne –400 reses– y la producción agrícola según criterios de sostenibilidá ambiental y excelencia son les señes d'identidá de Casa Bartuelo, una de les varies empreses de Gozón que faen d'esti conceyu un referente ganaderu dientro d'Asturies. “Nun me sorprende gota la proporción vaques-persones, Gozón ye un conceyu con munches esplotaciones y anguaño les mesmes han de tener mayor tamañu pa subsistir; ente eso y la perda de población, la cuenta sal sola”, razona Sila Fernández. 

Esta muyer cuenta que pa “repoblar” el campu, “lo primero ye frenar l'actual procesu de vaciáu”. Y lo segundo, “analizar por qué marchen los que marchen”. Entá más, “Asturies ye bien diversa y cada conceyu merecería'l so propiu analís y solución, el remediu pa Gozón nun tien por qué ser el mesmu qu'el d'otros conceyos, por casu del oriente o occidente asturianu”. A efectos prácticos, Sila Fernández defende “respetar y sofitar les actividaes y los usos tradicionales del campu, pero dotando a los sos pobladores de los servicios propios del sieglu XXI, y eso inclúi tola esfera de lo rellacionao con internet”. Esto ye, facilitar en cuenta de torgar. 

Ramón Artime ta nuna clave asemeyada a la de la empresaria: “El campu tien muncho que dicir a la d'encarar los retos del mileniu, empezando pola descarbonización, pero tengo les mios dudes de qu'Europa crea nel so potencial”. Y al respective de la creciente presión turística –qu'en Gozón ye manifiesta–, el conceyal popular tienlo tan claro como l'alcalde socialista: “Turistes sí, pero primero la xente del campu. Les vaques yá pastiaben nestos praos primero d'inventase'l veranéu”.