Lo habitual por estes feches ye que la Comisión Europea saque del caxón la tisoria y proponga recortes xeneralizaos de cupos de captura d'especies pesqueres de les que depende la viabilidá de la flota asturiana. Pero por una vegada, la tisoria tien les puntes moches y nun resulta tan amenazante: la propuesta que s'alza pal so alderique nel Conseyu de ministros europeos de Pesca a celebrar n'avientu ye partidaria per primer vegada en munchos años d'un aumentu xeneralizáu de los cupos, especialmente los d'aquellos pexes de gran interés pa los profesionales asturianos.
La Comisión fixo pública la so propuesta de llendes de captura pa les poblaciones de pexes nes agües europees del Océanu Atlánticu pa 2023, incluyíes les poblaciones d'agües fondes pa 2023 y 2024. La propuesta refierse a 17 totales almitibles de captures (TAC) y nella destácase que "la recuperación de les poblaciones más importantes, sobremanera'l chicharru, dexa a la Comisión proponer un aumentu de les cuotes". Esta propuesta inicial va actualizase depués de la conclusión de les consultes billaterales (con Noruega y el Reinu Uníu).
La Comisión propón afitar los TAC en puntos de Rendimientu Máximu Sostenible (RMS) pa seis de les ocho poblaciones del cupu que quier aumentar. Por casu, pa la merluza del Cantábricu (la especie de la que dependen más barcos asturianos), la propuesta ye una medría del 10% del total almitible de captures calteniéndose dientro del Rangu de RMS encamentáu polos informes científicos. Esti aumentu adicional del TAC de merluza axúntase al aumentu sustancial –un 84%– aprobáu'l pasáu día 17 d'ochobre a propuesta de la Comisión y sobre la base de dictames científicos. En total el TAC que plantega Bruxeles ye de 15.554 tonelaes.
Amás del cupu de merluza , la Comisión propón aumentar el del pixín nun 12%, hasta les 4.156 tonelaes; y el del gallu nun 33%, hasta 3.120 tonelaes. Bien desemeyaos son los casos del llinguáu o l'abadexu, pa los que s'aconseya recortar los cupos un 11 y un 10% respectivamente. Otres siete poblaciones pesqueres xestionaes namás pola Unión Europea siguen a la espera de dictame científicu , ente elles el bocarte nel Golfu de Vizcaya y trés poblaciones de llagostín.
Virginijus Sinkeviçius, comisionáu de Mediu Ambiente , Océanos y Pesca , declaró : "La nuesa propuesta d'aumentu de les captures de los stocks atlánticos xestionaos pola UE ye una bona noticia pa los pescadores y llega nel momentu oportunu vista la llaceriosa situación económica que traviesen, col preciu del combustible al alza, lo qu'afecta a la rentabilidá del sector. La propuesta amuesa que la ciencia basada na ordenación pesquera paga la pena".
La propuesta qu'alza la Comisión al Conseyu de Ministros, y que suel enveredar la toma de decisiones nel mesmu , básase nel asesoramientu científicu del Conseyu Internacional pa la Esploración del Mar (CIEM). Pa 8 de les 17 poblaciones sometíes a cupos, el dictame dexa a la Comisión proponer llendes de captura más grandes que los de 2022. Pa nueve poblaciones los datos científicos nun fueron consideraos "abondos"; arriendes d'ello, la propuesta sofita nel enfoque de procuru .
La llamada "pesca sostenible" fixo progresos sustanciales na UE. En 2022, el 80% de los TAC afitáronse nel nivel de RMS (14% en 2009), lo qu'a xuiciu de Sinkeviçius "permite un futuru saludable pa les poblaciones y los pescadores que dependen d'elles".
