Asturies pierde dos puestos por pesu industrial, entá perriba del 20% del PIB

Asturies perdió dos puestos nel "ranking" rexonal español pol pesu de la industria nel productu interior brutu (PIB) de cada comunidá, pero eso nun quita pa que se caltenga en puestos de cabeza y sigue superando –anque por pocu– l'oxetivu européu de que'l sector apurra siquier el 20% de la riqueza anual. 

Según el Barómetru Industrial presentáu esti día pol Conseyu Xeneral d'Economistes y el Conseyu Xeneral de Colexos Oficiales de Graduaos ya Inxenieros Técnicos Industriales d'España, a partir de datos del Institutu Nacional d'Estadística, Asturies pasó a ocupar en 2022 el sestu puestu pola relevancia de l'actividá fabril nel PIB. Un añu primero ocupaba la cuarta posición, per detrás de Navarra, La Rioxa y País Vascu. Aragón y Cantabria fueron les dos comunidaes qu'asitiaron tamién per delantre. Son les seis úniques rexones nes que la industria supera'l 20% del PIB, frente al 15,9% de la media española. Asturies baxara del 20% en 2020 pol impactu de la pandemia, pero recuperó esi nivel en 2021. 

Nel retrocesu de dos puestos nel "ranking" pudo influyir el zarru de les centrales térmiques de Lada y Soutu la Barca, y la relativización de la contribución industrial, igual non pola so propia mengua, como pola crecedera superior d'otros sectores como'l turísticu y polo xeneral los servicios, qu'aporten una contribución mayor al PIB. 

La enerxía ye la rama na qu'Asturies tien una mayor contribución: apurría en 2021 el 4,56% del total nacional, siguida por industries estractives (2,45%) ya industria manufacturera (2%), mentanto que nel suministru d'agua solo representa'l 0,85%. En xunto, Asturies supon solo'l 2,39% de la industria española, lo qu'asitia al Principáu como la quinta comunidá con menor aportación al sector fabril nacional pese al perfil industrial de la comunidá. Esto obedez al tamañu uniprovincial de la comunidá y de la so economía. Con too y con ello, el 2,39% ye una proporción significativamente pencima del pesu d'Asturies nel conxuntu d'España por PIB, censu empresarial y población activa, parámetros nos que degola'l 1,9%. 

El componente enerxéticu sigue siendo determinante nel eleváu perfil industrial de la comunidá. Ensin él, el pesu de la industria puramente manufacturera baxa a la redolada del 13% y la posición asturiana baxa de la sesta a la novena posición, per detrás de Navarra, País Vascu, La Rioxa, Aragón, Cantabria, Cataluña, Castiella y Lleón y Comunidad Valenciana, anque otra vuelta se caltien perriba del promediu nacional (11,4%). 

La industria apurre más del 15% del empléu asturianu frente al 13,3% n'España. Ehí, Asturies ye la sesta rexón, detrás de La Rioxa, Navarra, Aragón, País Vascu y Cataluña.