Los mozos d'Avilés aprienden a xugar el bolu batiente

Deporte, tradición y cultura. Eso ye lo que-yos esperaba a una docena d'estudiantes de terceru de Secundaria del institutu de La Madalena, qu'esti día allegaron al centru deportivu de Los Canapés pa una sesión de bolos, na so modalidá batiente, impartida por miembros de la Federación Asturiana de Bolos. En total, y a lo llargo de dos xornaes, pasaron pel polideportivu de Versalles ente 70 y 80 alumnos del centru educativu, que tamién fueron a les instalaciones de La Toba pa probar suerte con otra modalidá típica asturiana: la cuatriada. 

"Ye una actividá complementaria del centru p'amosar y fomentar el desarrollu de los xuegos tradicionales asturianos", esplicó Soraya Coballes, profesora d'Educación Física na Madalena. Al pie d'ella taba José Luis González, profesor d'asturianu nel mesmu centru. Dambos acompañaron a los alumnos que probaron suerte con delles tiraes. L'actividá, promovida por José Ramón Bada, tamién profesor de ximnasia nel institutu, ya s'entamó nos últimos años, teniendo "muncho ésitu" ente los estudiantes. "Magar que son modalidaes tradicionales, son bien novedoses pa ellos", destaca Coballes, qu'apunta que cada vez "hai menos instalaciones" onde poder dedicase a estes modalidaes. 

Como instructores y miembros de la federación taben Pelayo Álvarez y Alejandro Rodríguez, qu'esplicaron a los estudiantes les claves pa poder llanzar la bola, que tien trés tamaños con distintos pesos según la necesidá, por qu'impacte contra la decena de bolos de madera que s'alcuentren al otru estremu de la pista. Según cómo resulte la tirada, pueden llograse ente ún y cincuenta puntos. Les partíes, polo xeneral, xuéguense a 2.000 puntos. "Ye complicao, pide muncha práctica", señala Iker Camacho, ún de los escolares participantes na actividá, qu'esplica que sabía de la esistencia d'esta modalidá tradicional, pero que "nunca la vio". 

Amás de Camacho, taben tamién Sara Fernández y Sofía y Llara Rodríguez. Nenguna de les trés conocía estes modalidaes, pero les dos últimes sí que probaren na bolera del centru comercial de ParqueAstur. "Ye distinto enforma", señalaron les estudiantes, que valoraron positivamente la iniciativa de los sos profesores pa caltener y sopelexar esti deporte tradicional asturianu "por que nun esanicie". 

Depués de dellos llanzamientos de prueba, probaron suerte con un pequeñu tornéu individual y por pareyes pa ver quién-y garrara'l trucu a los bolos. Ente ellos, Rehan Perveen y Breinner Galarza, que destacaron que yera una actividá "prestosa" y "bien complicada", pero nun duldaron en participar na competición". 

Pelayo Álvarez, instructor de l'actividá, punxo en valor la importancia de la mesma, y apuntó qu'a lo llargo de les dos xornaes de formación, "dellos chavales" preguntáron-yos pola posibilidá d'apuntase "pa probar" y "quiciabes" competir, lo que reforzaría la vixencia d'un deporte tradicional entá mui vivu.