Cara y cruz de la Universidá n'Asturies: ye de les más barates pero'l riesgu de paru ye altu

Les families asturianes paguen menos que les d'una mayoría de rexones españoles poles tases académiques de la Universidá. Hai nesi sentíu menos barreres n'Asturies pal accesu al "ascensor social" de los estudios superiores, según se deduz del últimu informe de la Fundación Conocimiento y Desarrollo, dedicada, ente otres xeres, al analís de la realidá universitaria española. La semeya d'Asturies tien un reversu negativu: los titulaos tienen mayor riesgu que los d'otres comunidaes de sufrir desempléu.

Estudiar. La fundación que preside Ana Patricia Botín, primer executiva del Grupu Santander, apurre, ente otra información, un ranking rexonal col costu mediu de la matrícula universitaria pa los estudiantes. Asturies apaez como la segunda comunidá col preciu más baxu del creitu pa los graos en primer matrícula (12,3 euros nel cursu 2022-2023), solo perriba del de Galicia. Una carrera de cuatro cursos o 240 creitos suponía n'Asturies nel períodu estudiáu 740 euros por cursu, unos 400 euros menos qu'en Navarra, Madrid o Aragón, los territorios más caros. La posición asturiana ye asemeyada nel casu de los másteres venceyaos a los graos. 

La fixación de los precios correspuende a les autonomíes dientro d'una forqueta que determina un conseyu estatal. Ente 2012 y 2020, les decisiones de precios teníen que dir acompasaes a los costos. El modelu decayó nesi últimu añu, y una reforma recién (la Llei Orgánica del Sistema Universitariu de 2023) establez que les tases tienen d'evolucionar "nun marcu xeneral de contención o amenorgamientu progresivu".

Trabayar. L'informe comentáu realiza tamién una aproximamientu a la eficacia del "ascensor social" dende'l puntu de vista del empléu. Asturies pierde el rellumu nesti capítulu: ente la población n'edá de trabayar que tien estudios superiores, la tasa de paru (8,53% en 2022) ye la cuarta mayor d'España, per detrás de les que se ven n'Andalucía, Canaries y Estremadura, trés rexones caracterizaes en materia educativo, al contrariu qu'Asturies, por tases elevaes de fracasu escolar y, nel terrén económicu, por tener los niveles más baxos del país en productu interior brutu (PIB) por habitante. El mal datu d'Asturies –que remanez na tasa d'empléu de los universitarios, del 77,7%, la segunda menor d'España– ye consistente colos problemes de dinamismu de la economía rexonal y colos desaxustes tan frecuentemente comentaos ente la cualificación de los demandantes de trabayu y la ufierta que son quien a xenerar les empreses.

code

#HTML LLIBRE