El ganaderu de nueva xeneración que controla col móvil a les sos 38 vaques

Luis Miguel Ramos Álvarez ye, de magar yera neñu, un apasionáu de la ganadería y tercer xeneración de ganaderos en Villaperi (Uviéu). "Depués de los mios güelos y de mio padre, agora soi yo'l que sigue la tradición. Compaxino l'actividá ganadera col mio trabayu nuna distribuidora de llibros. Hasta va pocos meses yera mio padre quien controlaba los animales, venía velos tolos díes, mientres yo taba fuera; pero, depués del so fallecimientu, tengo, como quien diz, que doblame y que sacar hores d'onde puedo; si tienes animales, ye p'atendelos bien, por eso'l collar de monitorización de les vaques, que se llama ‘Rumi’, ta ayudándome bien dello", esplica esti profesional. Decidió apostar polos collares de nueva tecnoloxía polo muncho que-y faciliten el trabayu al mandu de la so ganadería La Trapa. 

"Col collar controles los animales dende'l teléfonu móvil. El dispositivu date tou tipu d'información de les vaques: el GPS dizte en cualquier momentu ónde tán, si tán comiendo, si tán rumiando, si tán echaes, lo que caminen diariamente, si la vaca ta tora o si ta muncho tiempu echada... A lo último, una información perútil que te da tranquilidá", esplica Luis Miguel Ramos.

Y amiesta: "El collar detecta tamién si l'animal ta poniéndose malu, lo que ye perimportante porque puede date tiempu atayar la enfermedá. L'añu pasáu perdí un toru por culpa d'un cachiparru". Diz que l'aparatu "Rumi" pue ser útil tamién pa detectar un posible ataque de fauna selvaxe: "Home, nun t'avisa en sí del ataque, pero si t'avisa de que l'animal tien muncho movimientu, si ta corriendo d'un llau a otru, si ta mui estresáu... Por casu, en Cantabria pónen-y el collar a los potros pequeños, que son carne de cañón pal llobu". 

Amás d'usalos, Luis Miguel Ramos tamién viende los collares, xunto col avisador de partos, que tamién ye mui útil a dicir d'esti ganaderu. "Llevo un mes y yá tengo pidíos pa un ganaderu de Panizales, otru en Llanera, dos en Riosa y tamién en Cantabria. Amás hai anguaño una subvención pa los qu'incorporen mecanismos de monitorización pa control del ganáu", recuerda.

“Cola ayuda del Gobiernu del Principáu d´Asturies”.