El año recién termináu remató entregando trabayos variaos cola asturianada como protagonista. Delles voces d'esta asturianada apurrieron discos curiosos con tratamientu, acompañamientu, producción y presentación estremáes que son exemplu de pluralidá y riqueza pero tamién de cómo entender, sentir y tratar -o saber tratar - el xéneru más representativu de la música d'esti país. Títulos y pieces perclásiques, arranxos sobre la tradición, igües curiosines y hasta temes novalinos apaecen con pesu en «Poema sinfónico» de la Banda Gaites «Noega», grabación conxunta con otros artistes y tamién, d'otros modos, a manera de cantares populares reibilicoquiaos con otros sones, alcuéntrense nel discu de Fernando Valle Roso «Camín d'ayures» (EveryGoodSong) que llevó'l premiu a «Meyor discu del añu» pa la Crítica de la RPA. D'igual manera les grabaciones cencielles pero necesaries qu'entrega añu ente añu la Fonográfica Asturiana contaron con «Recordando mi niñez», de la veterana María Teresa González Soto, acompañada a la gaita por unu de los grandes del xéneru, Óscar Fernández, y que ya recibi'l premiu de la Crítica de RPA a «Meyor discu del añu» na estaya de canción asturiana. Pero sobremanera, hai tres títulos de rescample pa señalar: «Aire», «Cancios y asturianáes» y «Cola lluz de l'alborada.

«Aire» remata'l llabor editorial y periodísticu de palmíu cola cultura asturiana de sellu Ámbitu nel llargor de munchos años. Arrexunta a una montonera d'intérpretes y compositores piqueros y cabezaleros de la escena folk, tradicional y jazzística d'Asturies. Ye un trabayu qu'amosa protagonismu especial pal curdión diatónicu como enxamás apaeciera na escena folk d'esti país. Un curdión que diba ser, d'aniciu al proyeutu, protagonista xunto a una voz sola y namás y que quedó como instrumentu de piruyu perimportante -más que protagonista únicu- pa tóes les voces presentes nel discu; como congriñu pa les espresiones vocales de tres deses grandes voces de la tradición asturiana: les de Mapi Quintana, Marta Arbas y Anabel Santiago. «Aire» cuenta tamién cola firma maxistral del pianista y compositor Jacobo de Miguel y cola presencia de Ruma Barbero, de «Felpeyu», y con otros músicos d'esti grupu de folk amás d'otros tantos que conformen anguaño la bandina «La Pingarata» o presentes nel grupu «La Bandina» y otres formaciones más y que llegaron a esti trabayu pa poner buzukis, percusiones, panderos, clarinetes, saxos, baxos, trompetes, guitarres, vigulín, gaita rabil, pianos o flautes. «Aire» repasa y presenta de manera paxolera cantares y pieces de cancioneros tradicionales d'Uría Maqua o del archivu de Xosé Ambás y Celestina de Ca' Sanchu o recoyíos y cantaos pol Colectivu Muyeres cuantayá y al empar arranxos ya igües orixinales, como tangos prestosinos o del colectivu de músicos que conforma esti gran trabayu discográficu.

Grupos como «Ástura», «Xaréu», «Ubiña» o «Blima» trabayen xuntos por primer vuelta nesti discu, que de xuru ye'l primer blagu y espeyu nel que posar la güeyada pa facer más trabayos orixinales y de calidá cola asturianada y los cancioneros. Dexa abierta pa ello la canciella.

El sellu Goxe Producciones presenta «Cancios y asturianaes», que non ye otra cosa qu'un regalín sonoru d'esa gran señora de la canción asturiana que ye Mariluz Cristóbal Caunedo. Un trabayu -esti- al que la pernomada y premiada intérprete (hestoria de les últimes décades de lo meyor del xéneru de l'asturianada con premios y reconocimientos abondo) dixo-y que non varies vueltes hasta que la convencieron «porque el trabayu non llevaría encaxetáes eses rareces d'agora». Mariluz Cristóbal Caunedo apaez dacuando pola escena asturiana xunto a otres intérpretes del Colectivu Muyeres y la compañía Factoría Norte pa representar con gran palmíu la obra «Inda suenen» polos teatros y cases de cultura y esto ocupa guapa parte del so tiempu. Lo que non-y prestaba a Mariluz Cristóbal Caunedo yera eso, metése a grabar un trabayu d'anovación o d'acomuñamientu raru y chocante con otres músiques porque, como bien desplica la propia intérprete, «yo soi fiel a la tonada qu'oyí y canté toa la vida y va cuantayá qu'oyes unes coses y unos discos a lo que llamen asturianada que sí, respeto, claro que respeto, porque son trabayos d'otros músicos, pero que non son pa mí y que non me presten». Cuando Mariluz Caunedo vio que la propuesta d'un trabayu novalín («Cancios y asturianaes», de títulu cenciellu) non diba dir aloñe d'aquellos imprescindibles ya hestóricos «Onde la ñublina posa» (2001) y «Cantar de seronda» (2005) aceptó entós porque sabe bien qu'estos discos sí que tienen pesu y posu na fonoteca tradicional asturiana. El resultáu del discu non malengaña: cenciellura, tresparencia, paxolería con credibilidá y ensin cuayar con otros elementos sonoros azainadores o de repegu. Un discu simple y direutu d'asturianada con cantares que son los que-y presten a Mariluz Cristóbal Caunedo: repertoriu del escritor Llorienzu Novo Mier colos sos versos conocíos y con cantares casigue d'estrena. Cancios perguapos col congriñu finu y amorosiegu de les guitarres, el buzuki, el vigulín, la viola, guitarra portuguesa, uillean-pipe (gaita irlandesa), flauta, baxu o programaciones precises. Un discu qu'anicia con «Averáivos, los pastores», que, como señala la intérprete, «mira'l tiempu que tien qu'enseñómela mío madre siendo yo neña y ella ya non sabía del orixen». Non podía salir entós mal trabayu abriendo asina. Arranxos ya igües musicales p'arriquecer esti gran discu corren de la cuenta de Rubén Bada, Lisardo Prieto, Dolfu R. Fernández, Elías García, Sergio Rodríguez, Pepín de Muñalén o Borja Baragaño y xunto a esa voz firme y única de Mariluz Cristóbal entreguen cancios y asturianaes... ensin esparavanes.

Anabel Santiago, presente nel denantes nomáu discu de la Banda Gaites «Noega» col cantar «La muyer que te lluchó», exemplu perguapu d'asturiana que casa bien con otros estilos musicales, y Héctor Braga (voz, arpa, gaita rabil, gaita fuelle y panderu) canten xuntos cuantagüey en discos propios, conciertos o proyeutos de grupos folk que guarden respetu d'altor pa l'asturianada. Y dacuando entreguen grabaciones, como asocede con esta de «Cola lluz de l'alborada» (Algamar Producciones), exemplu del so orixen y querencia pola música asturiana perclásica. Tonada dialogada, a solo, col piruyu d'instrumentación amañosa, tirando pal romance y pa otres estayes tradicionales «Cola lluz de l'alborada» tamién apurre criaciones orixinales ensin mazcaritar d'Héctor Braga, como la que-y pon nome al trabayu, «Gulpiyuri» o «Vivir mañana». Y pa señalar lo que non precisa de repoliscu pa paecer creíble, exemplu d'un discu d'asturianada pa oyir y gociar ensin más.