L'acebache o azabacha n'asturiano, l'acebiche gallegu y portugués, l'azabaya aragonesa, l'atzabella en Cataluña y l'azabache en castellán son términos que proceden del árabe. El árabe hispánicu "azzabag", remanez del persa "shabaq". Na dómina árabe desarrollóse enforma la cigua como un amuletu, como la forma d'espantar el temible mal de güeyu.
Col tiempu la Iglesia -que receló siempre de lo que sinificaba l'acebache- fue aceptándolu como un elementu integrador, col que se podía facer una magnífica artesanía llamada a emponderar les cuestiones relixoses; sin embargu rechazó la figa -cigua- musulmana que s'adaptó enforma a les carencies de los probes cristianos siempre temerosos del mal de güeyu. Hai que recordar que la cigua ye una mano apretada col deu gordu ente l'índiz y l'anular.
L'acebache siempre se relacionó cola bona suerte. Poníense y pónense tovía cigües a los ñeños pa que nun los agüeyen, escolingada d'una mano, al cuellu o prendida na ropa; Enrique de Villena parte del supuestu de que l'agüeyamientu ye un venenu que se comunica a través de la vista, numberando pa la so curación tres maneres eficaces: la preservativa qu'evitará que'l mal de güeyu se produzca; la de la prueba, cuando se trata de comprobar so naturaleza; y la curativa, que llibera al agüeyáu del dañu.
L'agüeyamientu sigue siendo un mal nel que creen les madres que tienen fíos pequeños. Nesti sen l'ilustráu José Caveda y Nava detalla mui bien nel llibru antolóxicu de poesíes publicáu en 1839 -y reeditada en tres ocasiones- una obra titulada "El ñeñu enfermu", na que cuenta la historia d'un críu agüeyáu per una bruxa, al qu'ente otros ungüentos y cataplasmes pónen-y, como métodos infalibles, la cigua antes de mamar, aspérxenlu con agua bendito, dan-y pan bendito mezclao cola comida, pónen-y un escapulariu, etcétera. Diz un trozu d'esa poesía lo siguiente:
Mañana ensin falta,
si é que llego allá,
con agua bendita
lu tengo asperxar,
y pone-y la cigua
antes de mamar;
y da-y pan benditu
mezcláu al papar; (...)
Per otra parte, en "Una aldegana del conceyu Xixón al Príncipe d'Asturies", Caveda escribe:
Pero fáltate la cigua:
¿Y quién sin ella te trai,
andando pel mundu bruxes
que te pueden agüeyar?
Tengo yo una de acebache,
bien curiosina en verdá.
La cigua ye seguramente la pieza más representada y más representativa d'Asturies dende siempre pola bona suerte: les más pequeñes, pa los ñeños, miden 5/6 milímetros y ente 20/25 milímetros pa los mayores, pero que pocu tienen que ver colos 15 cm qu'alcanzaron nel siglu XVII, cosa que tien que ver seguramente cola escasez del material al que nos aboca la falta de minería n'esplotación y que siguirá así seguramente pola falta de sensibilidá de les persones enfotaes nesti tema; por supuestu nunca se ficieron pieces tan milimétriques como hasta la fecha.
Per otra parte, la palabra cigua resulta cotidiana nel falar de los asturianos sobrepasando l'usu que se fai de la propia pieza d'acebache, ya inxertándose no cotidiano en frases feches y n'espresiones propies pa referise, por exemplu, al verdor de la fruta ("verde en cigua", se diz pa referise a la fruta na raxón).
Pero en realidá esta cualidá de la bona suerte ye propia de tol acebache que se fai, dende les pieces más tosques hasta les más estilizaes, separadamente o combináu con plata. Así, les bruxes utilicen dacuando una pieza d'acebache nes sesiones del agua ensin que tengan una forma determinada.
Nes Mariñes de Villaviciosa antiguamente había la costumbre de introducir trozos d'esti material ente les paredes d'arenisca de les cases o nes muries qu'encierra l'antoxana familiar, a fin de dar suerte a los que nella habiten.
Pero sobre too, l'acebache prospera o nun s'entiende ensin les pelegrinaciones a Santiago de Compostela. Evidentemente ya esistía l'artesanía del acebache dende antiguo. Nos castros astures del 700 o 800 antes de Cristo ya s'atopaben pieces y formes de trabayar l'acebache, como ye'l casu de Morión. Los romanos apreciábenlu, igual que los exipcios dende l'Antigüedá. Per otra parte, n'Uviéu, na cueva de Les Caldes, atopóse un colgante de la etapa solutrense d'aprosimadamente 15.000 a.C., la pieza más antigua que s'atopó hasta la fecha n'Asturies.
Pero l'artesanía que conocemos ye medieval -altu medieval quiciás-, nel 1200 comiencen a instalase los primeros talleres en Compostela. En Villaviciosa, santu y seña del acebache y la so talla, sábese con nombres y apellíos que ya en 1527 había un acebacheru llamáu Fernán Bravo y que dende esa fecha hasta anguañu l'espertu Monte Carreño señala qu'esistieron 200 acebacheros solamente en tierres de Maliayo, con dalgún xixonés y navetu.
Sin embargu, parez qu'en feches anteriores na Caleyina les Indies de la Villaviciosa amurallada, había acebacheros y acebacheríes como descubrió Rogelio Estrada mientres investigaba parte del subsuelu de dicha calle y los alredores del llenzu de la muralla del sieglu XIII, que dio abundantes pieces d'esti material. Les cates ficiéronse a contrarreló pero apaecieron pieces dañaes, material de desechu, y dalguna otra obra entera relacionada coles pelegrinaciones.
Les pelegrinaciones potencien estraordinariamente'l sector, que va desarrollándose en tornu al pasu del camín o caminos per Asturies. Así aparecen pieces significatives en conceyos cercanos. Por exemplu, atopóse recientemente nel altu La Madera, en Piloña, una cáscara d'acebache; en Grau, una cigua; n'Uviéu, un santiaguín que ye la más antigua representación d'esta pieza n'Asturies.
Trátase de pieces cencielles, muestra d'una orfebreria discreta, sosidiaria de les potentes fábriques lleoneses y compostelanes. Faen los collares de bola esférica, gargantielles con broche d'oru, rosarios de cuentes facetaes, manes d'acebache, perendengues de distintos tipos, la concha venera -l'abundante vieria-, cruces llatines, broches, prendedores, etcétera.
Sicasí, el material estráese fundamentalmente de Les Mariñes, en Villaviciosa, que ye ún de los pocos sitios onde s'estrae l'acebache, como ye bien sabío: Les Mariñes y Witby -n'Inglaterra, y yá desapaecida- son los dos referentes del occidente européu, onde hai otros acebaches de peor calidá y ensin una artesanía tan sofisticada. Quintes, Quintueles, Villaverde, Careñes, Argüeru, Oles... sobre tou la parroquia d'Oles congrega'l mayor númberu de mines y escombreres, de les cuales n'actualidá nun hai nenguna abierta pero sí s'aprovechen lo que podemos llamar los "detritus", lo que queda, que, de toes maneres, ye abondo: les escombreres d'una dómina en que l'acebache yera mui abundante.
