Depués de 1974, cuando'l grupu de Conceyu Bable revoluciona la vida social asturiana cola so llamada a la recuperación cultural d'Asturies dende la llingua, hai delles muyeres nacíes enantes de la guerra civil qu'empiecen a escribir y publicar n'asturianu. Anque d'obra curtia, quiciabes la más destacada de toes elles seya María Josefa Canellada (L'Infiestu, 1913 - Madrid, 1995), autora de gran intensidá. Filóloga, publicara en 1944 la tesis doctoral sobre El bable de Cabranes abriendo camín a los estudios de la escuela pidaliana sobre la llingua d'Asturies. A finales de los 70 hubo un intentu d'usar el so prestixu y sencia frente a los "escesos" de Conceyu Bable, pero Canellada sumóse con gustu al procesu reivindicativu y participó na fundación de l'Academia de la Llingua. El so Montesín (1980) ye a la vez qu'ún de los exemplos más notables de prosa asturiana de la so xeneración, el testu qu'inaugura la lliteratura xuvenil n'asturianu. Malia, Mariantia y yo, de 1990, ye una interesante narración alredor de la guerra civil.
Nené Losada Rico (Lluarca, 1991 - 2009) ye un bon exemplu d'evolución lliteraria; empieza a escribir poesía dientro de los postulaos del costumismu xeneracional, recreando en coples ( Cantares valdesanos, 1992) la vida de los campesinos del occidente asturianu. Pero a partir de 1997 da un xiru a la so obra pa construir una obra intimista y esencial, na que reflesiona sobre la vida y la muerte. Frente a ella, Eva González (Palacios del Sil, 1918 - 2007) caltiénse fiel a la escritura costumista, pero consigue crear una obra d'estraordinariu interés lliterariu y llingüísticu. Siguiendo'l so exemplu créase una corriente en L.laciana con presencia de muyeres: Emilce Núñez (Ourallu, 1931), Elena Calzada, Lucía Álvarez, Justina Valcárcel o Margarita González. Al otru llau del cordal, n'Asturies, podremos citar a Felisa Granda (Cualloto, 1924), la prosa lírica de Pilar Junco (Llanes, 1927) o a Sabel de Fausta (Xixón, 1934), que comparte munchos de los postulaos del primer Surdimientu.
Si l'españíu que supón l'aparición de Conceyu Bable a partir de 1974 permite que delles muyeres de posguerra escriban n'asturianu o qu'abandonen un costumismu tresnuecháu, va costar un poco más visibilizar a les coetanies del Primer Surdimientu. Vamos sabiendo de dalgunes que tán na primer llinia de la reivindicación nos años setenta, como Amelia Valcárcel o Elena Fernández Poch (qu'edita un Diccionario castellano-bable en 1975 o ye l'autora de les recetes que se publiquen nes primeres entregues de les páxines de "Conceyu Bable" na revista "Asturias Semanal", ensin firma), pero que nun tienen obra creativa n'asturianu. María Teresa González (Xixón, 1950-1995) forma parte de la militancia d'esa primer hora, pero nun va dase a conocer como escritora hasta los años ochenta, igual que Concha Quintana (Llanes, 1952), una poeta esencial naquellos años a pesar de que nunca recoyó la so obra en llibru. Más tardía ye entá la incorporación a les lletres asturianes de Montserrat Garnacho (Mieres, 1952), qu'empieza a publicar nos noventa, pela prensa asturiana, les sos Caleyes con oficiu, de María Esther García (La Degollada, 1948) o de Cristina Muñiz (Xixón, 1953), narradora que se da a conocer yá entráu'l sieglu XXI. Depués de consolidar una importante obra n'español, Carmen Gómez Ojea (Xixón, 1945) publicó dalgunes obres narratives n'asturianu.
Sicasí, va ser nos años ochenta cuando la muyer llogre un protagonismu na lliteratura asturiana en pie d'igualdá colos varones coetanios qu'escriben y formen parte del Segundu Surdimientu. Foron pioneres Sabela Fernández (Caeras, 1962) que publica en 1983 Ayundes, Yolanda M. Fidalgo (Salas, 1960) o Lourdes Álvarez (L'Agüeria, 1961), qu'empezó a dase a conocer nes revistes que dirixía Nel Amaro na cuenca del Caudal. Pero foi Berta Piñán (Cañu, 1963) al ganar el premiu de poesía de l'Academia de la Llingua Asturiana en 1985 la que marca'l momentu d'inflesión a partir del cual la presencia de la muyer dexa de ser una escepción pa convertise n'esencial: nun pue falase de bona lliteratura asturiana ensin tomar en consideración la obra d' Esther Prieto (Arenas, 1960; poeta esencialmente, ye la única muyer que gana'l Xosefa Xovellanos de novela con Güelu Ismail, del 2001), les narradores Consuelo Vega (Bustiyé, 1961), Carme Matínez (Xixón, 1955), Maite G. Iglesias (Llugones, 1963), Paquita Suárez Coalla (Grullos, 1965) y Marián García (Xixón, 1975), o les poetes Taresa Lorences (Cueva, 1955), Marta Mori (Xixón, 1965), Susana Rodríguez Sela (Uviéu, 1968) o Marisa López Diz (Xixón, 1970). Pero la llista de muyeres que s'incorporen a la lliteratura n'asturianu ta siempre abierta: Ángeles Carbajal (Argüeyes, 1959), Pilar Arnaldo (La Pontecastru, 1964) o Elvira Laruelo (Les Arriondes, 1970), acabante llegar, ocupen yá un sitiu d'honor ente los sos llectores y la crítica.
